મહા વાવાઝોડું રાજ્યના દરિયા કિનારે થી 600 કિલોમીટર દૂર છે, ત્યારે રાજ્ય સરકારે પણ તૈયારીઓ અને બચાવ કામગીરીની સમીક્ષા હાથ ધરી છે. રાજ્યના મહેસુલ સચિવ પંકજ કુમારે જણાવ્યું હતું કે, વાવાઝોડાને લગતી તમામ તૈયારીઓ કરી દેવામાં આવી છે. જેમાં NDRF અને SDRFની ટીમને સ્ટેન્ડ બાઈ કરી દેવામાં આવી છે. જ્યારે વધુ 15 NDRF ટીમને અન્ય રાજયમાંથી એરલીફ્ટ કરવામાં આવશે.
પંકજ કુમારે વધુમાં જણાવ્યું હતું કે, મહા વાવાઝોડા અંગે સરકારે તૈયારી પુરી કરી છે. વાવાઝોડા અંગેની પરિસ્થિતિની સંપૂર્ણ સમીક્ષા કરવામાં આવી છે. જ્યારે રાજ્યના મુખ્ય સચિવ જે.એન.સિંઘ પણ સાંજ સુધીમાં જિલ્લા કલેકટર પોલીસ અધિક્ષક સાથે વિડિઓ કોન્ફરન્સથી તૈયારીઓની સ્થાનિક કક્ષાની માહિતી મેળવશે. વાવાઝોડા પહેલા દરિયો ખેડવા 12 હજાર બોટ ગઈ હતી, જેમાં 600 બોટ અટવાઈ હતી, બાદમાં આ 600 બોટ દરિયામાંથી કિનારે પરત ફરી છે. જે સાંજ સુધીમાં પરત આવશે. તમામ માછીમારો સંપર્ક સાધવામાં આવ્યો છે. ઉપરાંત દરિયા કિનારાના નજીકના વિસ્તારોમાં લોકોને સ્થળાંતર કરવાનો નિર્ણય મંગળવાર સુધીમાં લેવામાં આવશે. જ્યારે વાવાઝોડાને અસરને કારણે સોમનાથ, દિવ, જૂનાગઢ, અમરેલી, ભાવનગર જેવા દરિયા નજીકના જિલ્લામાં વરસાદ પડશે તેવી સંભાવના વ્યક્ત કરાઈ છે.
હવામાન વિભાગના ડિરેકટર જયંત સરકારે જણાવ્યું હતું કે, ગુજરાતના દરિયાકિનારે વાવાઝોડુ ટકરાશે, ત્યારે 80 કિલોમીટર પ્રતિ કલાકની ઝડપે પવન ફુંકાશે. જેના કારણે કાચા મકાનોને અસર પહોંચશે. દિવ અને પોરબંદરમાં લેન્ડ ફોલ થવાની શક્યતા છે. અત્યારે ચક્રવાત પોરબંદરથી 680 અને દિવથી 720 કિલોમીટર દૂર છે. વાવાઝોડું કાલે કઈ બાજુ ફંટાશે તેના પર આધાર છે. પણ ગુજરાતના દરિયા કિનારે આવતા વાવાઝોડાની ત્રિવતામાં ઘટાડો જોવા મળી રહ્યો છે. વાવાઝોડુ નબળુ પડી રહ્યુ છે.
રાજ્યના કેબિનેટ અને રાજયકક્ષાના પ્રધાનોને પણ તમામ જિલ્લામાં મોકલવામાં આવશે.
