ગાંધીનગર : સમગ્ર વિશ્વમાં સૌપ્રથમ વખત ડ્રોન ટેકનોલોજી દ્વારા ખેતરમાં નેનો યુરિયાના છંટકાવનો (Farming with drone technology)ગુજરાતમાં ગાંધીનગર જિલ્લાના ઇસનપુર મોટા ગામથી શુભારંભ થયો છે. મુખ્યપ્રધાન ભૂપેન્દ્ર પટેલે ડ્રોનમાં નેનો યુરિયા ભરીને ડ્રોન ઓપરેટ કરીને રાજ્ય સરકારની ડ્રોન ટેકનોલોજીની પહેલ કરી શુભારંભ કરાવ્યો હતો. જેમાં સીએમ ભુપેન્દ્ર પટેલે જણાવ્યું હતું કે, વડાપ્રધાન નરેન્દ્ર મોદી ખેડૂતોની આવક બમણી કરવા સતત પ્રયત્નશીલ છે. ખર્ચ ઘટે અને ઉત્પાદકતા વધે એવા પ્રયત્નો કરાઈ રહ્યા છે ત્યારે ગુજરાતમાં આધુનિક ટેકનોલોજીના ઉપયોગ દ્વારા અમે એ દિશામાં મહત્વનું પગલું ભર્યું છે. જ્યારે ડ્રોન ની મદદથી ખેતી બાબતે સૌ પ્રથમ સમાચાર ETV Bharatએ 22 જાન્યુઆરીના દિવસે પ્રસિદ્ધ કરવામા આવ્યા હતા.
વિદેશી હૂંડિયામણ બચશે અને સબસીડીનો ખર્ચ ઘટશે - કૃષિ વિમાન-કિસાનનું વિમાન એટલે ડ્રોન. એવી ઓળખ આપીને ડ્રોન ટેકનોલોજી(Use of drone technology in agriculture)દ્વારા ખેતરમાં નેનો યુરિયાના છંટકાવની સો ટકા રાજ્ય પુરસ્કૃત યોજનાનો શુભારંભ કરતા મુખ્યપ્રધાન ભૂપેન્દ્ર પટેલે જણાવ્યું હતું કે, સમગ્ર દેશ આઝાદીનો અમૃત મહોત્સવ ઉજવી રહ્યો છે. વર્તમાન સમયમાં હવે કોઈએ દેશ માટે મરી ફીટવાની( Use of drone technology )જરૂર નથી. હવે સૌએ દેશનું ગૌરવ વધે એ રીતે જીવન જીવવાની જરૂર છે. પ્રાકૃતિક સંપદાનું જતન અને સંવર્ધન થાયએ રીતે જીવવાનું છે. નેનો યુરિયાના ઉપયોગથી રાસાયણિક ખાતરોની આયાતમાં ખર્ચાતું વિદેશી હૂંડિયામણ બચશે અને સબસીડીનો ખર્ચ પણ ઘટશે. એટલું જ નહીં, ડ્રોન દ્વારા નેનો યુરિયાના છંટકાવથી પાણીની પણ બચત થશે. નાની નાની વસ્તુઓની કાળજી લેવાથી આપણે દેશની મોટી સેવા કરી શકીશું.
આ પણ વાંચોઃ ડ્રોન ટેક્નોલોજી વડે છંટકાવની અસરકારકતા વધારવા થશે નિર્ણાયક કૃષિ કામગીરી, ખેડૂતનો ખર્ચ ઓછો થશે
યુરિયાના વપરાશને ઘટાડવા અનુરોઘ - વિશ્વમાં સૌ પ્રથમ વખત ડ્રોન દ્વારા નેનો યુરિયાનો છંટકાવ કરવાનો આરંભ કરવામાં આવ્યો છે, તે સમયે ઇફકોના ચેરમેન દિલીપ સાંઘાણીએ જણાવ્યું હતું કે, દેશના વડાપ્રધાન નરેન્દ્ર મોદીએ ખેડૂતોની સમૃઘ્ઘિ, સલામતી અને આર્થિક ઉન્નિતનું સ્વપ્ન જોયું છે. નેનો યુરિયાનું સંશોઘન વિશ્વમાં સૌ પ્રથમ ઇફકોએ કર્યું છે, વડાપ્રધાન નરેન્દ્ર મોદીએ ધરતી અને વાયુના રક્ષણ તથા સૌ નાગરિકોના આરોગ્યની સલામતી માટે યુરિયાના વપરાશને ઘટાડવા અનુરોઘ કર્યો હતો. ઇફકોના સંશોઘકોએ નવીન પ્રયોગો હાથ ઘરીને નેનો યુરિયાનું નિર્માણ કર્યું છે.
11000 જેટલા પરિક્ષણો - નેનો યુરિયાને વેચાણ માટે મુકતાં પહેલા સરકાર દ્વારા અનેક પરિક્ષણો કરવામાં આવ્યા છે, તેવું કહી તેમણે જણાવ્યું હતું કે, નેનો યુરિયાના સંશોઘન અને ફાયદાઓ અંગે દેશના પ્રગતિશીલ ખેડૂતો સમક્ષ પ્રેઝેન્ટેશન રજૂ કરવામાં આવ્યા હતા. તેમજ દેશના વિવિધ પ્રાંત, સ્થળો ખાતે 11000 જેટલા પરિક્ષણો સરકારની નિશ્રામાં કરવામાં આવ્યા હતા. નેનો યુરિયા અંગે દેશના પ્રાંત અનુસારની 6 સિઝન અને 94 પાકો પર પ્રયોગ કર્યા બાદ તેના સફળ પરિણામોના આઘારે નેનો યુરિયાને માન્યતા આપવામાં આવી છે.
આ પણ વાંચોઃ રાજ્યમાં હવે ડ્રોનથી યુવાનોને મળશે રોજગારી, ટૂંક સમયમાં શરૂ થશે નવો કોર્સ
પહેલા સરકાર કેટલી સબસીડી પાછળ થતો હતો ખર્ચ - ખેડૂતો પોતાની જમીનમાં ઘાન્ય ઉગાડીને દેશની સેવા કરે છે, તેવું કહી તેમણે કહ્યું હતું કે, યુરિયા ખાતરની આયાત કરવી પડે છે. આ માટે કેન્દ્ર સરકારે વિદેશી હુડિયામણ ચુકવવું પડે છે. દેશના ખેડૂતોને યુરિયાની એક થેલી રુપિયા 268 માં આપવા માટે કેન્દ્ર સરકારે રૂપિયા 3700ની સબસીડી આપે છે. જેની સામે નેનો યુરિયાની 500 મી.લિ. ની બોટલ રુપિયા 240 મળે છે. જેથી સરકારને સબસીડીની બચત થાય છે. વિદેશમાં જતું હુડિયામણ બચી જાય છે અને ખેડૂતોને પણ ફાયદો થાય છે. આ એક પ્રકારની રાષ્ટ્રસેવા જ છે. આ રાષ્ટ્રસેવામાં ગુજરાત સરકારે યોગદાન આપવા માટે બજેટમાં રૂપિયા 35 કરોડની ફાળવણી કરી છે. ખેડૂતોની સંસ્થા એવી ઇફકોએ 20 ટકા ડિવિડન્ટ આપ્યું છે. તે ઉપરાંત ગુજકોમાસોલ જેવી અનેક ખેડૂતોની સંસ્થાઓ ખેડૂતોને સારામાં સારું ડિવિટન્ડ આપી રહી છે. ડ્રોન થકી નેનો યુરિયાનું કામ ખેડૂતો ઝડપથી કરી શકશે. કૃષિક્ષેત્રે નવી ક્રાંતિની દિશામાં ખેડૂતોએ આ ટેકનોલોજી થકી ડગ માંડયા છે.
ખેડૂતોને ડ્રોન આપવા માટે જોગવાઈ - ખેતી નિયામક એસ.જે. સોલંકીએ મહાનુભાવોનું શાબ્દિક સ્વાગત કરીને જણાવ્યું હતું કે, કૃષિ ક્ષેત્રમાં અધતન ડ્રોન ટેકનોલોજીનો ઉપયોગ વઘે તે માટે રાજય સરકારે બજેટમાં રૂપિયા 35 કરોડની જોગવાઇ કરી છે. જેના થકી 1.40 લાખ એકરમાં એટૂસોર્સ અને આઇ.ખેડૂત પોર્ટલ પધ્ધતિથી કામગીરી કરવામાં આવનાર છે. ગામોના કલસ્ટર બનાવી સંબંઘિત જિલ્લા ખેતીવાડી અધિકારી દ્વારા ખેડૂતોના નામની યાદી તૈયાર કરવામાં આવશે. તેમના ખેતરમાં નેનો યુરિયાનો છંટકાવ ડ્રોન થકી કરીને ઇફકો દ્વારા એવેલ્યુશન રીપોર્ટ તૈયાર કરવામાં આવશે. આ કાર્યને સુચારુ રીતે કરવા માટે ઇફકો સંસ્થા દ્વારા રાજયમાં 35 ડ્રોન લાવવામાં આવ્યા છે. ફિલ્ડ સ્ટાફને તાલીમ બંઘ કરવામાં પણ આવ્યા છે. તેમણે જણાવ્યું હતું કે, આઇ- ખેડૂત પોર્ટલ પધ્ધતિ મારફતે રૂપિયા 23 કરોડનો ખર્ચ થનાર છે. 92000 એકરમાં નેનો યુરિયાનો છંટકાવ કરવામાં આવશે. વ્યક્તિગત ખેડૂતોએ આ પોર્ટલ પર ઓનલાઇન અરજી કરવાની રહેશે.
