ભાજપ શાસિત દ્વારકા નગરપાલિકાના પ્રમુખ અને ઉપપ્રમુખ પદ માટે બિનહરીફ વરણી

દ્વારકા નગરપાલિકાના પ્રમુખ પદ માટે 2017ની ચૂંટણી મુજબ અઢી વર્ષની ટર્મ રાખવામાં આવી હતી. જે પૂર્ણ થતા ભાજપ શાસિત દ્વારકા નગરપાલિકાના પ્રમુખ તરીકે મહિલા સભ્ય જ્યોતિબેન સામાણી અને ઉપપ્રમુખ પદે પ્રકાશભાઈ વાઘેલાની બિનહરીફ વરણી કરવામાં આવી હતી.

દેવભૂમિ દ્વારકાઃ ગુજરાતના પશ્ચિમ છેવાડે આવેલા યાત્રાધામ દ્વારકામાં 7 વોર્ડ અને 28 સભ્યો ધરાવતી ભાજપ શાસિત નગરપાલિકા છે. દ્વારકામાં વર્ષે લાખો યાત્રાળુઓ અને રાજકીય નેતાઓના આવાગમન હોવાથી યાત્રાધામ દ્વારકા અને નગરપાલિકા ખૂબ જ મહત્વનું સ્થાન ધરાવે છે.

દ્વારકા નગરપાલિકાના પ્રમુખ પદ માટે 2017ની ચૂંટણી મુજબ અઢી વર્ષની ટર્મ રાખવામાં આવી હતી, ત્યારે અઢી વર્ષ પૂર્ણ થતા દ્વારકા નગરપાલિકાના પ્રમુખ જિતુભા માણેક અને ઉપપ્રમુખ પરેશભાઈ ઝાકરીયાએ નવા પ્રમુખ અને ઉપપ્રમુખને ચાર્જ આપ્યો હતો.

બીજા અઢી વર્ષની ટર્મમાં પ્રમુખ પદ માટે મહીલા ઉમેદવાર જ્યોતિબેન સામાણી અને ઉપપ્રમુખ પદ માટે વાલ્મિકી સમાજના યુવાન અને દ્વારકા નગરપાલિકાના સદસ્ય પ્રકાશભાઈ વાઘેલાની બિનહરીફ વરણી કરવામાં આવી હતી.જ્યોતિબેન સામાણી અગાઉ પણ નગરપાલિકાના પ્રમુખ તરીકે સુંદર કામગીરી કરી ચૂક્યા છે. ત્યારે અહીં મહત્વની બાબત એ છે કે, દ્વારકામાં વસતા સફાઈ કર્મચારી પરિવાર અને વાલ્મિકી સમાજમાંથી આવતા યુવાન પ્રકાશભાઈ વાઘેલાની ઉપ પ્રમુખ પદે વરણી કરતા વાલ્મિકી સમાજમાં હર્ષની લાગણી અનુભવાઈ હતી. આ અંગે પ્રકાશભાઈએ જણાવ્યું કે, તેઓ વાલ્મિકી સમાજ અને પરિવારના સભ્ય હોવાથી દ્વારકાની સફાઈની મારી જવાબદારી હવે વધી જાય છે અને તેમાં હું ખરો પણ ઉતરીશ.