ડાંગ: દેશમાં જ્યારે કોરોના વાઇરસના સંક્રમણે જોર પકડ્યું છે અને કેસ દિવસેને દિવસે વધી રહ્યા છે. ત્યારે સરકાર દ્વારા લોકડાઉન અમલી બનાવાયું છે. આવી કપરી સ્થિતિમાં કોરોનાના યોદ્ધા ડોકટર્સ, આરોગ્ય તંત્ર અને પોલીસ કર્મીઓએ અવિરત સેવા પૂરી પાડી છે. હાલની પરિસ્થિતિને જોતા ડાંગ જિલ્લામાં કુપોષણને નિવારવા અને પોષણની સેવાઓ પૂરી પાડવા રાજ્યના મહિલા અને બાળ કલ્યાણ વિભાગના આંગણવાડી કાર્યકર બહેનોએ બીડુ ઝડપ્યું છે.
ઈન્ચાર્જ પ્રોગ્રામ ઓફિસર જિજ્ઞાસાબેન એ.ચૌધરીએ જણાવ્યું હતું કે, હાલ આંગણવાડી બંધ છે. તેવા સંજોગોમાં કોઇ લાભાર્થી પોષણના લાભથી વંચિત ન રહી જાય તે માટે આંગણવાડી કાર્યકરો દ્વારા ક્ષેત્રીય કામગીરી કરી સરકાર દ્વારા અપતા ન્યુટ્રીશન પેકેટ લાભાર્થીના ઘર પહોચાડવામાં આવી રહ્યું છે.
બાળકો માટે બાલ શક્તિ, સગર્ભા અને ધાત્રી માતા માટે માતૃ શક્તિ અને કિશોરીઓ માટે પૂર્ણા શક્તિના પેકેટનું વિતરણ જિલ્લાના તમામ આઇસીડીએસના લાભાર્થીઓને આપવામાં આવ્યું છે. સમગ્ર ડાંગ જિલ્લાના કુલ 31349 બાળકો , 8172 કિશોરીઓ અને 5856 સગર્ભા અને ધાત્રી માતાને આ ન્યુટ્રીશન પેકેટોનો લાભ એપ્રિલ મહિના દરમિયાન આપવામાં આવ્યું હતું.
હાલમાં ચાલી રહેલા કોરોના વાઇરસ પ્રત્યે સાવધાની રાખવાની બાબતે જિલ્લાના આંગણવાડી કાર્યકર અને તેડાગર બહેનો પોતાની ફરજની સાથે સાથે તકેદારી રાખવાનો સંદેશો પણ આપી રહી છે. આ બહેનો સંક્રમણનો ભોગ ન બને તેની સાવચેતીના પગલે જિલ્લાની આરોગ્ય શાખા દ્વારા તમામ બહેનોને માસ્ક અને આઇસીડીએસ શાખા દ્વારા સેનેટાઇઝર પૂરા પાડવામાં આવ્યા હતા.
