ડાંગના બીજુરપાડા ગામે સેવાસેતુનો પ્રારંભ કરાવતા અધિક સચિવ એન.પી.લવીંગીયાએ જણાવ્યું હતું કે, હંમેશા લોકોની ચિંતા કરનાર તથા દિર્ધદ્રષ્ટિ ધરાવતા રાજ્યના મુખ્યપ્રધાન વિજય રૂપાણીના માર્ગદર્શન હેઠળ સમગ્ર રાજ્યના તાલુકાઓમાં આવેલા ગામોમાં સેવાસેતુ કાર્યક્રમ થકી લોકોને સરળતાથી સેવાઓ મળી રહે તેવી વ્યવસ્થા કરવામાં આવી છે.
પાંચમાં તબક્કામાં પહોંચેલા સેવાસેતુ દરમિયાન 1.50 કરોડ લોકોની અરજીઓનો નિકાલ કરાયો હતો. તેમજ જુદા-જુદા 13 જેટલા વિભાગોની 51 પ્રકારની સેવાઓ લાભાર્થીઓને સ્થળ ઉપર જ આપી દેવાઇ છે. અત્યાર સુધી 99 ટકા અરજીઓનો નિકાલ કરાયો છે. અધિક સચિવ લવીંગીયાએ વહીવટી તંત્રના અધિકારીઓને અભિનંદન પાઠવ્યા હતા.
આ તકે પ્રાયોજના વહીવટદાર અને ઈન્ચાર્જ નિવાસી અધિક કલેકટર કે. જી.ભગોરાએ જણાવ્યું હતું કે, પહેલા લોક દરબાર યોજવામાં આવતા હતા. હવે સેવાસેતુના માધ્યમથી લોકોને પોતાના ધર આંગણે જ આ લાભ આપી દેવામાં આવે છે. લોકોને તાલુકા કે જિલ્લા કચેરીઓના ધક્કા ખાવા પડતા નથી. ચાર-પાંચ ગામોના ક્લસ્ટર બનાવીને એક ગામમાં લોકોની જરૂરિયાત મુજબની સેવાઓના લાભ આપવામાં આવે છે. ખેતીવાડી યોજના, આરોગ્ય, આવક-જાતિના દાખલા, વિધવા સહાય, વૃદ્ધ પેન્શન, દુધાળા પશુઓને લગતી યોજનાઓ તથા ટ્રાયબલ સબ પ્લાનની યોજનાઓનો લાભ લેવા અનુરોધ કર્યો હતો.
પ્રાંત અધિકારી કાજલ ગામીતે જણાવ્યું હતું કે, અત્યાર સુધીમાં ડાંગના 38 ક્લસ્ટર બનાવીને 23 સેવાસેતુ યોજવામાં આવ્યા છે. જેનાથી 30,000 લાભાર્થીઓને જુદી જુદી યોજનાનો લાભ અપાયો છે. સેવાસેતુના આ કાર્યક્રમમાં મહાનુભાવોના હસ્તે માં વાત્સલ્ય કાર્ડ, સિનિયર સીટીઝન પ્રમાણપત્ર તથા વિવિધ યોજનાના લાભાર્થીઓને લાભ અપાયો હતો. અધિક સચિવના હસ્તે બીજુરપાડા સરપંચ કાંતીલાલ રાઉતને મહાત્મા ગાંધીજીના 150મી જન્મ જયંતિ નિમિત્તે સ્મૃતિ ચિહ્ન ચરખો અર્પણ કરાયો હતો.
આ પ્રસંગે એ.પી.એમ.સી.ડિરેકટર રતિલાલ રાઉત, સુબીર મામલતદાર એમ.એસ.માહલા, લાયઝન ઓફિસર અને ડિઝાસ્ટર મામલતદાર જયેશ પટેલ, તાલુકા વિકાસ અધિકારી સુરેશ કલારા, શાળાના આચાર્ય મુકેશ એચ.ચૌધરી, આયુવેર્દિક હોસ્પિટલના ર્ડા.દિગ્વેશ ભોયે, ર્ડા.દિલીપ શર્મા, ઈજનેર દિલીપ ચૌધરી સહિત મોટી સંખ્યામાં ગ્રામજનો ઉપસ્થિત રહ્યા હતા.
