ડાંગઃ બે દિવસીય કલા મહાકુંભ 2019-20 આહવામાં તારીખ 21 અને 22ના રોજ યોજાયો હતો,જેમાં દરેક સ્પર્ધકોએ ઉત્સાહભેર ભાગ લીધો હતો. રાજ્યના રમતગમત યુવા સાંસ્કૃતિક પ્રવૃત્તિઓ વિભાગ, ગાંધીનગર તેમજ કમિશ્નર યુવક સેવા અને સાંસ્કૃતિક પ્રવૃત્તિઓ તથા જિલ્લા વહીવટી તંત્રના સંયુક્ત ઉપક્રમે આ ત્રીજા કલા મહાકુંભનું આયોજન કરવામાં આવ્યું હતુ. જિલ્લા કક્ષાએ પ્રથમ આવનારને રૂપિયા 1500 બીજા ક્રમે આવનાર રૂપિયા 1000 અને ત્રીજા ક્રમે આવનારને 750ના રોકડ પુરસ્કાર અપાશે.
જિલ્લા વિકાસ અધિકારી એચ.કે. વઢવાણીયાએ કલા મહાકુંભમાં જણાવ્યું હતું કે, કલા એટલે સાધક અને સાધ્યના એકત્વને પોંખવાનો અવસર. સાચી કલા એટલે અભાવમાં નહીં પણ ભાવમાં પ્રગટે છે. અભાવમાં નહીં પરંતુ ભાવમાં જીવવું એ જ સાચી કલા. કલાકાર પોતાની કલા દ્વારા આનંદની અનુભૂતિ કરાવે છે. કલા મહાકુંભથી કલાકારો ગૌરાન્વિત થયાનો અહેસાસ અનુભવશે.
રાજ્ય સરકારના મહત્વના આધારસ્તંભ સમાન પારદર્શકતા,સંવેદનશીલતા, નિર્ણાયકતા અને પ્રગતિશીલતા આ ચાર દિશામાન છે. વિકાસના વિજય માર્ગ ઉપર વિશ્વાસના અજવાળા પાથરવા સાંસ્કૃતિક વિભાગોએ પણ કમર કસી છે. કલાની ઉપાસનાથી જે સિદ્ધિઓ મેળવી કલાકારોએ ગણનાપાત્ર પ્રદાન કર્યું હોય તેમને સમજાવતી ઋણ સ્વીકારવા રાજ્ય સરકાર કલાકારોને સન્માનિત કરે છે.
જિલ્લા કલા મહાકુંભમાં તાલુકા પંચાયત પ્રમુખ નરેશભાઈ ગવળી, સુરેશભાઈ ચૌધરી, પદાધિકારીઓ જિલ્લા શિક્ષણ અધિકારી એમ.સી ભૂસારા, જિલ્લા રમતગમત અધિકારી વિરલ પટેલ, ગાંડાભાઇ પટેલ સહિત મોટી સંખ્યામાં કલાકારો ઉપસ્થિત રહ્યા હતા.
