આહવામાં આંતરરાષ્ટ્રીય બાળ અધિકાર દિનની ઉજવણી કરવામાં આવી હતી. જેમાં બાળસુરક્ષા એકમના ચેરમેન અને કલેક્ટર એન.કે. ડામોરે આંતરરાષ્ટ્રીય બાળ અધિકાર દિવસની શુભેચ્છા આપતાં જણાવ્યું હતું કે, આપણે પોતાના બાળકોને સુવિધા આપીએ છીએ તેવી જ આદર્શ વ્યવસ્થા સરકાર દ્વારા કરવામાં આવી છે. આ બાળકોને હસતાં, રમતા અને વાંચતા શીખવાડીએ તો સમાજમાં તેઓ સ્વમાનભેર જિંદગી જીવી શકશે. સરકાર, વહીવટી તંત્ર અને સંસ્થાઓની મદદથી આ બાળકોને નાગરિક તરીકેના હક્કો, અધિકાર મળવા જોઈએ. ત્યારે જ સાચા અર્થમાં બાળ અધિકાર દિવસની ઉજવણી સાર્થક ગણાશે.
નાયબ પોલીસ અધિક્ષક આર. ડી.કવાએ જણાવ્યું હતું કે, આપણે આપણું કર્તવ્ય નિભાવવાનું છે. બાળકોમાં આઈ.ક્યુની સાથે ઈ.ક્યુ પણ જોવાનો છે. આપણું કાર્ય બાળકોને લક્ષ્ય સુધી પહોંચાડવાનું છે.
દહેજ પ્રતિબંધક અધિકારશ્રી એશ.ડી.સોરઠીયાએ સ્વાગત પ્રવચન દરમિયાન કહ્યું હતું કે, અહીં કુલ 38 બાળકો છે. બાળકો સાથે રહી બાળકોનો વિકાસ કરીએ. કોઈપણ બાળક પોતાના અધિકારથી વંચિત ન રહી જાય તે આપણે જોવાનું છે.
આંતરરાષ્ટ્રીય બાળ અધિકાર દિવસની ઉજવણી પ્રસંગે ચિલ્ડ્રન હોમના તમામ બાળકોને માં અમૃતમ યોજનાના લાભ માટે કાર્ડનું વિતરણ કરાયું હતું. તેમજ દાતાઓનું સન્માન કરવામાં આવ્યું હતું. આ પ્રસંગે બાળ સુરક્ષા અધિકાર ચિરાગ જોષી ,181 ટીમ, ચાઈલ્ડ હેલ્પ લાઇન 1098 ટીમ, ચાઈલ્ડ વેલફેર કમિટીના સભ્યો સહિત ચિલ્ડ્રન હોમના તમામ કર્મચારીઓ, પદાધિકારીઓ ઉપસ્થિત રહ્યા હતાં.
