ડાંગઃ પ્રાપ્ત વિગતો અનુસાર લોકડાઉનથી જીલ્લામાં મજુરી કામ કરનારા લોકોની હાલત કફોડી બનવા લાગી છે. ત્યારે આ કપરી પરિસ્થિતિમાં સરકાર દ્વારા જરૂરીયાતમંદ લોકો સુધી અનાજ પહોંચાડવામાં આવી રહ્યું છે. સાથે જ આ જરૂરીયાતમંદ અને ગરીબ લોકોના વ્હારે સેવાભાવી લોકો અને સંસ્થાઓ પણ આગળ આવી છે. જીલ્લાના શામગહાન સેંટ ઝેવિયર્સ સોશિયલ સર્વિસ સોસાયટી દ્વારા ખુબ જ જરૂરીયાતમંદ અને રેશન કાર્ડ વિહોણા કુલ 26 ગામના લોકોમાં ાં કુલ 442 જેટલી અનાજની કીટ પહોંચાડી હતી. આ કીટમાં પાંચ કિલો ચોખા, પાંચ કિલો ઘઉંનો લોટ, 1 કિલો તુવેર દાળ, એક લીટર તેલ, ન્હાવા- ધોવાના એક-એક સાબુ જેવી તમામ જરૂરી વસ્તુઓ આપવામાં આવી હતી.
સંસ્થાના વડા કિરીટ પટેલીયાએ જણાવ્યું હતું કે, આ મુશ્કેલીના સમયમાં સંસ્થાના તમામ સભ્યોએ સાથે મળી અનાજ કીટ તૈયાર કરી જરૂરીયાત મંદ લોકોના ગામોની શોધખોળ કરી અનાજ કીટ વિતરણ કર્યું હતું.
