ડાંગ ટુ દિલ્હીની IITમાં સૌપ્રથમ પ્રવેશ મેળવનાર થોરપાડા ગામનો અવીરાજ ચૌધરી સહ્યાદ્રીની ગિરીમાળાઓમાં વસતા પછાત આદિવાસી પરિવારના અવીરાજે એન્જીનીયરીંગની સર્વોચ્ચ પરીક્ષામાં સફળ થઇ IIT દિલ્હીમાં પ્રવેશ મેળવ્યો છે, જે ડાંગ જિલ્લાના ઈતિહાસમાં પ્રથમ ધટના બની છે.શિક્ષણ તમામ ક્ષીતીજના દરવાજા ખોલી નાંખે છે.,ગરીબ-તવંગર જેવા કોઇ ભેદ શિક્ષણમાં નથી. 'સિધ્ધિ તેને જઇ વરે જે પરસેવે ન્હાય' એ ઉક્તિ આજે થોરપાડાના અવીરાજે સિધ્ધ કરી બતાવી છે.
સહ્યાદ્રીની ગિરીમાળામાં વસેલો ડાંગ જિલ્લો 3 બાજુથી મહારાષ્ટ્રની સીમા ધરાવે છે. અહીં ડુંગરો-ખીણો ધરાવતા પ્રદેશમાં લોકો માત્ર વરસાદ આધારીત ખેતી કરીને પોતાનુ ગુજરાન ચલાવે છે.આહવાથી અંદાજીત 40 કિ.મી.ના અંતરે આવેલા થોરપાડા ગામમાં આજે ખુશીનો અવસર બન્યો છે. ગામના ખેડૂત પરિવારનો સૌથી નાનો દિકરો અવીરાજ સખારામભાઈ ચૌધરી નામના યુવાને દેશની સર્વોચ્ચ એન્જીનીયરીંગ ક્ષેત્રે લેવાતી પરીક્ષામાં 1020 મો ક્રમાંક મેળવીને દેશની નામાંકિત IIT દિલ્હીમાં ટેક્ષટાઈલ ટેકનોલોજીમાં પ્રવેશ મેળવ્યો છે.
ભણવામાં હોંશિયાર એવા અવિરાજે પ્રાથમિક શિક્ષણ પોતાના જ ગામની ધો.1 થી 5 નું શિક્ષણ પ્રાથમિક શાળામાં લીધુ હતું. ત્યારબાદ બાજુના ગામની પ્રાથમિક શાળા કડમાળમાં 8 માં ધોરણ સુધી અભ્યાસ કરીને ધોરણ-9 થી 12 સુધીનું શિક્ષણ સંતોકબા ધોળકિયા વિઘામંદિર-માલેગામમાં લીધુ હતું. સંસ્થાપક પી.પી. સ્વામી વન વિસ્તારમાં શિક્ષણની સેવાની ધૂણી ધખાવી રહયા છે. હંમેશા તેજસ્વી બાળકોને આર્થિક રીતે મદદ કરીને જરૂરી માર્ગદર્શન આપીને ગરીબ વિઘાર્થીઓને મદદ કરે છે.
અવીરાજના પરિવારની વાત કરીએ તો પિતા સખારામભાઈ અને માતા સેવંતિબેનને 11 સંતાનો છે જેમાં-6 દીકરાઓ અને 5 દીકરીઓ છે. વિશાળ પરિવારમાં અવીરાજ સૌથી નાનો છે. તેમના મોટાભાઈ બારકિયાભાઈ ગ્રેજ્યુએટ થઇ SRP ગૃપ નં 14 માં ફરજ બજાવે છે. બીજા રામુભાઈએ FY BA સુધી અભ્યાસ કર્યો છે. મોટી બહેનો અભણ છે અને લક્ષ્મીબેન SY BA સુધી અભ્યાસ કર્યો છે,કલ્પના ધો.10 સુધીનો અભ્યાસ કર્યો છે. બાકીના ભાઈઓ-બહેનો આર્થિક પરિસ્થિતિ સારી ન હોવાથી અભ્યાસ છોડી ખેત મજૂરી કરી જીવન ગુજારી રહ્યા છે.
