ડાંગ: જિલ્લાનાં વહીવટી મથક આહવાની ગ્રામ પંચાયતમાં મહિલા સરપંચ તરીકે રેખાબેન જીતેશભાઈ ચૂંટાઈ આવ્યા હતા. આહવા ગ્રામ પંચાયતમાં કુલ 18 સભ્યોનું સંખ્યાબળ જોવા મળે છે. આહવા ગ્રામ પંચાયતનાં મહિલા સરપંચ દ્વારા પહેલા પણ વિકાસકીય કામોમાં ભારે ગેરરીતિઓ આચરતા તેમના સામે અવિશ્વાસની દરખાસ્ત મુકાઈ હતી.
તે સમયે ડાંગ જિલ્લાનાં ભાજપાનાં નેતાઓ મધ્યસ્થી બનતા પ્રથમ વખતની અવિશ્વાસની દરખાસ્તનો મામલો થાળે પડ્યો હતો. આહવા ગ્રામ પંચાયતનાં મહિલા સરપંચ દ્વારા ફરીવાર ગ્રામ પંચાયતનો વહીવટ ચૂંટાયેલા સભ્યોને વિશ્વાસમાં લીધા વગર ચાલુ રાખતા તેમજ આહવા ગ્રામ પંચાયતનો વહીવટ મહિલા સરપંચની જગ્યાએ તેમના પતિ દ્વારા કરવામાં આવતા આખરે કુલ 18 સભ્યોમાંથી 13 સભ્યોએ આ મહિલા સરપંચ વિરુદ્ધ આજરોજ તલાટીકમ મંત્રી સહિત આયોજન સહ તાલુકા વિકાસ અધિકારીને અવિશ્વાસની પ્રસ્તાવ અરજી આપતા ગ્રામ પંચાયત વર્તુળમાં ખળભળાટ મચી ગયો હતો.
