દમણમાં ભાજપ કાર્યાલય ખાતે મંગળવારે ઉત્તરાયણના દિવસે જિલ્લા ભાજપની ચૂંટણીને લઈને એક બેઠકનું આયોજન કરવામાં આવ્યું હતું. જેમાં જિલ્લામાં તમામ મહત્વના આગેવાનો તેમજ કાર્યકરો ઉપસ્થિત રહ્યા હતા. ત્યારે દમણ ભાજપના મહત્વના આગેવાન નેતા ગણાતા નવીન અખુંના ભાઈ શશીકાંતે અન્ય કાર્યકર જયેશ પટેલને કાર્યાલયમાં જ ગાળો આપી હતી.
જેને કારણે મામલો તંગ બન્યો હતો. જેમાં જયેશ પટેલે ગાળો આપનાર શશીકાંત જ્યારે પાર્ટી કાર્યાલય બહાર નીકળ્યો ત્યારે તેને રોકી પોતાને અપમાનિત કર્યો હતો. તેના જવાબમાં તેને જાહેરમાં ગાળો આપી અપમાનિત કર્યો હતો. આ સમયે પાર્ટી કાર્યાલય બહાર બોલાચાલીનો મામલો મારામારી સુધી પહોંચે તેવી શક્યતા દેખાતા સાંસદ લાલુભાઈ પટેલ તથા અન્ય આગેવાનોએ બંને કાર્યકરોને સમજાવી રવાના કર્યા હતા.
ઉલ્લેખનીય છે કે, દમણ ભાજપ કાર્યાલય ખાતે આગામી જિલ્લા અધ્યક્ષની ચૂંટણીને લઈને મંગળવારે દમણ ભાજપ તરફથી દમણ જિલ્લા માટે અસ્પિ દમણિયા અને દીવ જિલ્લા માટે પિયુષ ટંડેલનું નામ સૂચવ્યું હતું. જે અંગે આ બેઠકનું આયોજન કરવામાં આવ્યું હતું. જેમાં કાર્યકરો વચ્ચે પોતાના વર્ચસ્વને લઈને બોલાચાલી અને ગાળાગાળી થતા બેઠકનો પણ ફિયાસ્કો થયો હતો.
આ બબાલથી ભાજપના કાર્યકરો વચ્ચે ચાલતો વિખવાદ સપાટી પર આવ્યો છે. જે જોતા આગામી દિવસોમાં રાજકારણ ગરમાય તેવા એંધાણ વર્તાઈ રહ્યા છે.
