દમણમાં ભારે વરસાદને પગલે તંત્રનું હાઈ એલર્ટ

દમણ: સંઘપ્રદેશ દમણમાં છેલ્લા 36 કલાકથી ભારે વરસાદ વરસી રહ્યો છે. ઉપરવાસમાં પડેલા ભારે વરસાદને પગલે મધુબન ડેમમાં 2.55 લાખ ક્યુસેક પાણી છોડવામાં આવ્યું હતું. જેથી વાપી અને દમણના નીચાણવાળા વિસ્તારોમાં 3થી 6 વાગ્યા સુધી હાઈ એલર્ટજાહેર કરવામાં આવ્યું હતું. જે અંતર્ગત પ્રશાસન દ્વારા દમણમાં સાવધાનીના પગલાં લેવામાં આવી રહ્યા છે.

જ્યારે ભારે વરસાદ અને દરિયાઈ ભરતીને કારણે મોટી દમણના કેટલાક વિસ્તારોમાં વરસાદી પાણીનો ભરાવો થયો હતો અને વહીવટી તંત્ર દ્વારા જે.સી.બી વડે પાણીના નિકાલની કામગીરી હાથ ધરવામાં આવી હતી. તેમજ પાણી ભરાવાને પગલે મોટી દમણ વિસ્તારના કેટલાક માર્ગો બંધ કરવામાં આવ્યા હતા. કોઈ પણ અગમ્ય ઘટનાને પહોંચી વળવા માટે પ્રશાસન દ્વારા દમણની સાર્વજનિક સ્કૂલમાં હંગામી આપાતકાલીન સેન્ટર તરીકે ખોલવામાં આવ્યું હતું.

તેમજ દરિયા કાંઠે ઠેર ઠેર પોલીસ બંદોબસ્ત પણ ગોઠવી દેવામાં આવ્યો હતો. જો કે, મોટી દમણ બજાર વિસ્તારમાં કેટલાક ઘરોમાં વરસાદી પાણી ઘુસતા અહીંના લોકોને મુશ્કેલીનો સામનો કરવો પડ્યો હતો. લોકોના જણાવ્યા મુજબ બે દિવસથી ઘરોમાં પાણી ભરાઈ ગયા છે, છતાં અહીં પ્રશાસનના કોઈ અધિકારી જોવા આવ્યા નથી.

તો મોટી દમણના જમ્પોરના દરિયા કિનારે કેટલાક સહેલાણીઓ જીવના જોખમે દરિયાના ઉછળતા મોજાઓની વચ્ચે નહાતા પણ જોવા મળ્યા હતા. હાલ નાની દમણ અને મોટી દમણના કાંઠા વિસ્તાર સહીત માંગેલવાડ, મીતનાવાડ, ખારીવાડ અને ઘાંચીવાડને હાઈ એલર્ટ પર મુકવામાં આવ્યા છે. જેનું કલેક્ટર અને ડેપ્યુટી કલેક્ટર સહિતના અધિકારીઓ દ્વારા સતત મોનીટરીંગ કરવામાં આવી રહ્યું છે.