રવિવારે સાંજે વડાપ્રધાન નરેન્દ્ર મોદીએ દેશભરમાં 500 ઉપરાંત સ્થળો પર મૈં ભી ચૌકીદાર કાર્યક્રમ હેઠળ સીધો સંવાદ કરી કરોડો કાર્યકરોને સંબોધન કર્યું હતું. વીડિયો લિંકથી કરાયેલ આ સંબોધનને માણવા સેલવાસ અને દમણમાં ભાજપ દ્વારા ખાસ આયોજન કરવામાં આવ્યું હતું. જેમાં ભાજપના ટોચના નેતાઓ સહિત મોટી સંખ્યામાં કાર્યકરો ઉપસ્થિત રહ્યાં હતાં. તમામે સમૂહમાં બેઠક વ્યવસ્થા જાળવી કાર્યક્રમને નિહાળ્યો હતો. અને મોદીને સાંભળ્યા હતા.
આ વિડીયો કોન્ફરન્સ દ્રારા મોદીએ કાર્યકરોને સંબોધન કર્યું હતું, તો લોકોના પ્રશ્નોના જવાબ પણ આપ્યા હતાં. કાર્યક્રમમાં બીજેપીના સેલવાસના ઉમેદવાર નટુભાઈ પટેલ, પ્રદેશ ભાજપના આગેવાનો જ્યારે દમણમાં દમણ દીવ ભાજપના ઉમેદવાર લાલુભાઈ પટેલ, પ્રદેશ અધ્યક્ષ ગોપાલ ટંડેલ, ઉપાધ્યક્ષ મનોજ નાયક, દીપેશ ટંડેલ સહિત મોટી સંખ્યામાં કાર્યકરો ઉપસ્થિત રહ્યા હતાં.
