દમણમાં મોટી દમણ લાઈટ હાઉસથી જામપોર બીચ પર દરિયાકિનારે ગેરકાયદેસર ઘર બનાવી વસવાટ કરતા લોકોના ઘર પર બુલડોઝ ફેરવી દેતા સ્થાનિક લોકોમાં આક્રોશ ભભૂકી ઉઠ્યો હતો. આ આક્રોશને પગલે રવિવારે સવારે મોટી દમણ ફૂટબોલ ગ્રાઉન્ડ પાસે મોટી સંખ્યામાં લોકો એકઠા થયા હતાં. જેને દૂર કરવા માટે પોલીસ કાફલો ખડકી પાણીનો મારો ચલાવ્યો હતો.
ત્યારબાદ પણ લોકોનું ટોળું નહીં વિખેરાતાં દમણ મામલતદાર દ્વારા 144ની કલમ લાગુ કરી હોય જેથી લોકોને શાંતિથી પોતાના ઘરે જવા અને જે રસ્તાઓ બ્લોક કર્યા છે તેને ખુલ્લા કરવાની ચેતવણી આપી હતી. જેનું લોકોએ પાલન નહીં કરતા આખરે પોલીસ દ્વારા હળવો લાઠી ચાર્જ કરી ટોળાને વિખેરવાનો પ્રયાસ કર્યો હતો.
જો કે, તે દરમિયાન કેટલાક યુવાનોની પોલીસે ધરપકડ કરી હતી. જે બાદ વધુ એક ટોળું રાજીવ ગાંધી સેતુ બ્રિજ પર પહોંચી જતા પોલીસે ત્યાં પહોંચી વિરોધ કરી રહેલી મહિલાઓની ધરપકડ કરી હતી અને તમામને પોલીસ મથકે લાવવામાં આવ્યા હતાં.
હાલ સમગ્ર મોટી દમણમાં પ્રશાસને 144ની કલમ લાગુ કરી છે. જ્યારે આ સમગ્ર મામલે દમણ કલેકટર સાથે ટેલિફોનિક વાત કરતા તેમણે જણાવ્યું હતું. કે, હાલ પરિસ્થિતિ કાબુમાં છે. આ કોઈ મોટો ઇસ્યુ નથી. તેમ કહી વધુ વિગતો આપવાનું ટાળ્યું હતું.
ઉલ્લેખનીય છે કે, એક તરફ સરકાર ગરબોને ઘરનું ઘર આપવાનું સપનું બતાવી રહી છે, ત્યારે ચૂંટણી વખતે નેતાઓના વાયદાઓ માની ખોબલે ખોબલે મત આપનાર આ ગરીબ લોકોના ઘર પર પ્રશાસને બુલડોઝર ફેરવી દેતા લોકોમાં ખૂબ જ આક્રોશ વ્યાપ્યો છે. એક પણ નેતા તેની ખબર સુધ્ધાં કાઢવા ફરકયા નથી, ત્યારે લોકોનો આક્રોશ કદાચ ગંભીર સ્વરૂપ ધારણ કરી શકે તેવી દહેશત સેવાઇ રહી છે.
હાલમાં તો પોલીસે પોતાનો બળપ્રયોગ કરી અંદાજિત 80 જેટલા લોકોની ધરપકડ કરી આગળની કાર્યવાહી હાથ ધરી છે. હવે જોવું રહ્યું કે આ મામલે લોકોના આક્રોશને ડામવા હજુ પણ બળપ્રયોગ કરશે કે પછી સ્થાનિક નેતાઓની દખલગીરીથી મામલો થાળે પાડશે.
