દાહોદ: દાહોદની ઝાયડસ હોસ્પિટલમાં સારવાર લઇ રહેલા કોરોના વાઇરસના વધુ ચાર દર્દીઓ સાજા થઇ જતા રજા આપવામાં આવી છે. કોરોના વાઇરસના દાહોદમાં નોંધાયેલા 34 પૈકી હવે માત્ર બે જ એક્ટિવ કેસ રહ્યા છે.
દાહોદમાં અત્યાર સુધી કોરોના વાઇરસના નોંધાયેલા તમામ કેસો એસિમ્ટમેટિક રહ્યા છે. એટલે કે, દર્દીને કોરોના વાઇરસ લાગું પડ્યો હોય પણ તેમનામાં એના કોઇ જ પ્રકારના લક્ષણના હોય તેવા દર્દીઓ છે.
દાહોદમાં જિલ્લા વહીવટી તંત્ર દ્વારા બનાવવામાં આવેલી ડેડીકેટેડ કોવિડ-19 હોસ્પિટલમાં તમામ દર્દીઓને સારવાર આપવામાં આવી રહી છે. અહીં ડૉ. મોહિત દેસાઇ અને તેમની ટીમ દ્વારા દર્દીઓને સઘન સારવાર આપવામાં આવતા દર્દીઓ તંદુરસ્ત થઇ રહ્યા છે.
આજે શાહરૂખભાઇ યુસુફભાઇ સબ્જીફરોજ , ચુનિયાભાઇ જીથરાભાઇ હઠીલા , મુકેશભાઇ પ્રહલાદભાઇ વણઝારા , મુકેશભાઇ મંગાભાઇ અણસેરિયાને તાળીઓના ગડગડાટ સાથે હોસ્પિટલમાંથી વિદાય આપવામાં આવી હતી.
