દાહોદ: વડાપ્રધાન નરેન્દ્ર મોદીના સ્વચ્છ ભારત અભિયાનને વેગવંતુ બનાવવા માટે અને પર્યાવરણ જાગૃતિ અભિયાનને જોશ પૂરુ પાડવા જિલ્લા વિકાસ અધિકારી રુચિત રાજ દ્વારા દાહોદ નગરમાં પ્લાસ્ટિકના બદલામાં ચા નાસ્તો આપવાનો નવતર પ્રયોગ શરૂ કરવામાં આવ્યો છે.
દાહોદ નગરના મધ્યમાં આવેલ તાલુકા પંચાયત નજીક તંત્ર દ્વારા સખી મંડળના સહયોગથી ચા-નાસ્તા માટે પ્લાસ્ટિક કેફેની શરૂઆત કરવામાં આવી છે. આ પ્લાસ્ટીક કાફેમાં તમારી પાસે પૈસા નહીં હોય પરંતુ, તમારી પાસે પ્લાસ્ટિકનો કચરો હશે તો વજનના હિસાબે તોલીને તેના બદલામાં ચા અથવા મેથીના ગરમાગરમ ભજીયા આપને આપવામાં આવશે.
તાલુકા પંચાયત કચેરી સામે ખોલવામાં આવેલા પ્લાસ્ટિક એક જિલ્લા વિકાસ અધિકારી રચિત રાજ દ્વારા તેનું ઉદ્ધાટન કરવામાં આવ્યું છે. પ્લાસ્ટિકથી પર્યાવરણને થતાં નુકસાનને રોકવા માટે દાહોદમાં આ પ્રયોગને સૌથી અનોખી પહેલ માનવામાં આવી રહી છે. આ પ્લાસ્ટીક કાફેમાં કોઈપણ વ્યક્તિ 500 ગ્રામ પ્લાસ્ટિક જમા કરાવીને એક કપ ચા કે કોફી મેળવી શકે છે. જ્યારે એક કીલો પ્લાસ્ટીક આપીને એક પ્લેટ ગરમાગરમ મેથીના ગોટા ખાઈ શકે છે. આ ઉપરાંત પૌંવા, દાબેલી, કચોરી, સમોસા પણ મંગાવી શકશે. અત્યારે સહાય જૂથની 10 મહિલાઓ આ cafe ચલાવી રહી છે.
આ પ્રયોગ દાહોદમાં સફળ થતાં જિલ્લાના દરેક તાલુકા મથકે આવું કાફે શરૂ કરાશે. કચરો વીણવાવાળી ગરીબ વ્યક્તિ હોય, કે પછી શહેરને સ્વચ્છ રાખવા તત્પર એક જાગૃત નાગરિક હોય, તે દરેક નાગરિક માટે આ કાફે ઉપલબ્ધ હોવાનું જાણવા મળ્યું છે. જો તમે પણ એક કિલો પ્લાસ્ટિક લાવો અને તેના બદલામાં તમને સમોસા, ભજિયા કે પૌંવા મળશે. આ ઉપરાંત 500 ગ્રામ પ્લાસ્ટિકના બદલામાં ટી પાર્ટી પણ કરી શકો છો. આ કાફેમાં એકઠું થનારું પ્લાસ્ટિક તંત્ર દ્વારા રિસાઇકલ કરી વેચવામાં આવશે. આ અનોખો પ્રયોગ દાહોદમાં સફળ થતા જિલ્લાના દરેક તાલુકા મથકે આવું કાફે શરૂ કરાશે.
