દાહોદ: જિલ્લાના ઝાલોદ નગરપાલિકાની ચૂંટણીમાં કોંગ્રેસ માટે સત્તા જાળવી રાખવી જરૂરી હતી, તો ભાજપ માટે ફરીથી સત્તારૂઢ થવું એ જ પ્રશ્ન હતો. આ માટે યોજાયેલી ચૂંટણીમાં કુલ 28 સભ્યોમાંથી 27 સભ્યો હાજર રહ્યાં હતાં. પ્રમુખપદ માટે માત્ર સોનલબેન ડીંડોરનું નામ આવતા તેઓને બિનહરીફ જાહેર કરવામાં આવ્યાં હતાં.
ઉપપ્રમુખ તરીકે કોંગ્રેસ તરફથી કિરણભાઈ વસૈયાનું નામ જાહેર કરવામાં આવ્યું હતું. ઉપપ્રમુખની ચૂંટણી દરમિયાન ભાજપ અને કોંગ્રેસના સભ્યોએ સભામાં વ્હીપ સંદર્ભે હોબાળો મચાવતા માહોલ ગરમાયો હતો. કોંગ્રેસના ઉમેદવારે વ્હીપને લઈ વિરોધ ઉઠાવી વોકઆઉટ કર્યો હતો, ત્યારે ભાજપના 8 સભ્યો, અપક્ષ 4 અને 3 કોંગ્રેસના સભ્યોએ અપક્ષ ઉમેદવાર નંદાબેન રાજુભાઈ વાઘેલાને વોટ આપતા વિજય જાહેર થયા હતા.
પ્રમુખ અને ઉપપ્રમુખની ચૂંટણીમાં કોંગ્રેસનો ઉમેદવાર પ્રમુખ બિનહરીફ ચૂંટાઇ આવ્યાં હતાં. જ્યારે ઉપપ્રમુખની ચૂંટણીમાં કોંગ્રેસના બાગી સભ્યોએ વોટ ન આપતા અપક્ષ સભ્ય ઉપપ્રમુખ તરીકે વિજેતા જાહેર કરવામાં આવતાં અનેક રાજકીય ચર્ચાઓ ચર્ચામાં રહી હતી.
