ભાવનગરઃ "સબકા સાથ સબકા વિકાસ" ના સૂત્ર સાથે કાર્યરત સરકારનો વિકાસ ભાવનગરના ઉમરાળા તાલુકામાં થાકીને ઉભો રહી ગયો હોય તેવો અહેસાસ અહીના ગ્રામજનો કરી રહ્યા છે. ભાવનગર જિલ્લાના ઉમરાળા તાલુકાના ગંગાસતીના સમઢિયાળા ગામે કોઝ વે તુટી જતાં લોકોને ભારે હાલાકીનો સામનો કરવો પડી રહ્યો છે. લગભગ 20 જેટલા ગામોથી જોડાયેલા આ રસ્તા પર લોકોને જીવના જોખમે પસાર થવું પડે છે. થોડા દિવસો પૂર્વે આ કોઝ વે પરથી પસાર થતી વખતે વાલ્મીકિ સમાજના એક આધેડે જીવ પણ ગુમાવ્યો છતાં તંત્ર હજી ઉદાસીન બની તમાશો જોઈ રહ્યું હોય તેવું લાગી રહ્યું છે.
ગંગાસતી અને પાનબાઈના પવિત્ર ધામમાં હજારો લોકો દર્શન કરવા આવે છે, 3 વર્ષથી કોઝ વે તુટી ગયો છે ત્યારે વરસાદી સિઝનમાં જનતાને ખુબ જ પરેશાની ભોગવવી પડે છે. ત્રણ વર્ષથી પુલનું કામ શરૂ છે પરંતુ ગોકળગાયની ગતિએ ચાલી રહેલા પુલની કેટલી રાહ જોવી પડશે તેવું ગ્રામજનો પૂછી રહ્યા છે.
વિકાસના કામોમાં થતી ઢીલાશ એટલેકે ગોકળગતિએ ચાલતા કામોથી લોકોમાં ભારે નારાજગી પ્રવર્તી રહી છે. નેતાઓ તૈયાર થયેલા કામોના લોકર્પણમાં એટલેકે રીબીન કાપવામાં જેટલા તત્પર હોય છે એટલી જ તત્પરતા જો થઇ રહેલા કામોને પૂર્ણ કરાવવા તરફ દાખવે તો સાચા અર્થમાં વિકાસની ગાડી પુર ઝડપે દોડી શકે છે અને જેમાં લોકોનો પણ પુર ઝડપે વિશ્વાસ સાથેનો પ્રેમ સામેલ થઇ શકે છે.
