ભાવનગર : જિલ્લામાં છેલ્લા ચાર દિવસથી વરસાદી માહોલ જોવા મળી રહ્યો છે. સામાન્ય રીતે 15 જૂન આજુબાજુ ચોમાસાનો વિધિવત પ્રારંભ થતો હોય છે, પરંતુ આ વર્ષે નિસર્ગ વાવાઝોડાને પગલે ૩ જૂનથી વરસાદ વરસી રહ્યો છે. છેલ્લા ચાર દિવસોમાં ભાવનગર શહેર, ગ્રામ્ય, તળાજા, મહુવા, વલ્લભીપુર પંથકમાં વાવણી લાયક વરસાદ વરસી જતા જગતનો તાત ખુશખુશાલ જોવા મળી રહ્યો છે.
જિલ્લાના લગભગ મોટાભાગના વિસ્તારમાં વાવણી લાયક વરસાદ વરસ્યો છે. સારા વરસાદથી ધરતીપુત્રો ગેલમાં આવી ગયા છે. આ વર્ષે જે પ્રકારે ચોમાસાની શરૂઆત થઇ છે તેના પરથી ખેડૂતો અનુમાન લગાવી રહ્યા છે કે આ વર્ષે એકંદરે ચોમાસું સારું રહેશે અને સમયસર વરસાદ પણ વરસશે. જિલ્લાના ગ્રામ્ય વિસ્તારોમાં ખેડૂતો વાવણીના કામમાં જોતરાઈ ગયા છે. આજે પણ અનેક ખેડૂતો હજુ પણ પોતાના વડીલોની માફક પરંપરાગત રીતે હળ સાથે બળદો જોડી અને વાવણી કરે છે. વરસાદ બાદ 1 કલાક બાદ બળદો દ્વારા વાવણી કરી શકાય છે. જ્યારે ટ્રેકટર દ્વારા તે શક્ય નથી.
ભાવનગરના ખેડૂતો આ વર્ષે મગફળી-કપાસનું વાવેતર કરી રહ્યા છે. આ ઉપરાંત બાજરી, તલ, જુવાર અને મકાઈ જેવા પાકોનું પણ મોટા પ્રમાણમાં વાવેતર કરશે. હળ સાથે પાછળના ભાગે વાવણી માટેની તૈયાર કરેલી ખાસ ઓરણી લગાવી દઈ અને તેમાં વિવિધ પ્રકારે જમીન ખેડી તેમાં ચાસ પાડી અને બીજ વેરવામાં આવે છે. જ્યારે સાથે સાથે ઘરની મહિલાઓ ખાતરનો પણ છંટકાવ કરે છે. વાવણીના સમયમાં પરિવારના બાળકોને રમત રમતની વાવણી કાર્યમાં જોડી દઈ પાટિયું ફેરવવામાં પણ સામેલ કરે છે.
જિલ્લામાં મુખ્યત્વે કપાસ, મગફળી, બાજરી, જુવાર જેવા પાકોનું વાવેતર કરવામાં આવે છે. જેમાં મગફળી અને કપાસ જેવા પાકો ખેડૂત અગાઉથી કોરામાં વાવી દેતા હોય છે. જેથી વરસાદ સમયસર અને સારો પડે તો મોલાત વહેલી ઉછરે છે. જેમાં હાલ 3000 હેક્ટરમાં કપાસ અને 800 હેક્ટરમાં મગફળીનું વાવેતર હજુ સુધીમાં કરવામાં આવ્યું છે.
