ભાવનગરમાં હુક્કાબારમાં નશો કરતા 13 નબીરાઓની ધરપકડ

ભાવનગરઃ આજકાલ મોજશોખ અને દેખાદેખીમાં યુવાધન નશાના રવાડે ચડી જાય છે અને સારા-નરસાનું ભાન પણ રહેતું નથી. ભાવનગરમાં આવા જ 13 નબીરાઓને SOGની ટીમે હુક્કાબારમાં નશીલા હુક્કાનો દમ મારતા ઝડપી લીધા હતા. સાથે જ હુક્કાબારમાં વપરાતી વસ્તુઓને કબ્જે લઇ તમામ સામે કાયદેસરની કાર્યવાહી હાથ ધરવામાં આવી હતી.

માહિતી પ્રમાણે, ભાવનગર SOG ટીમને બાતમી મળી કે, શહેરના હિમાલયા મોલમાં પ્રથમ માળે શોપ નં.111માં ગેરકાયદેસર હુક્કાબાર ચાલતું હતું. જેથી એસઓજીની ટીમે આ જગ્યા પર દરોડો પાડતા ગેરકાયદેસર હુક્કાબાર મળી આવ્યું હતું. પોલીસે હુક્કાબારના સંચાલક સાજીદ શેખ અને અસર પઠાણને ઝડપી લીધા હતા.

પોલીસને આ શખ્સો પાસેથી 198 હુક્કાની ચિલમ પાઈપ, 11 હુક્કાની ચિલમ, જુદી જુદી ફ્લેવરના તમાકુના 6 ડબ્બાઓ, જારો, કોલસો, ચીપીયો, મ્યુઝીક સીસ્ટમ સહિતનો મુદ્દામાલ કબ્જે કરી બંને ઇસમો સામે કાયદેસરની કાર્યવાહી હાથ ધરી હતી. આ દરોડા દરમિયાન હુક્કાબારમાં હુક્કાનો કસ લગાવી રહેલ બે યુવતીઓ સહીત 13 નબીરાને પણ પોલીસે ઝડપી લીધા હતા અને તેમની સામે જરૂરી કાર્યવાહી કરી હતી.