ભાવનગરઃ જિલ્લાના બે સાહસિક ઈજનેર રાહુલ સંઘવી અને રવિ પરમાર દ્વારા રેમોનર્સ નામનું મશીન વિકસાવવામાં આવ્યું છે. આ મશીનની ખાસિયત એ છે કે, 150 ફૂટ દૂરથી તેનું મોનિટરીંગ કરીને વ્યક્તિનું ટેમ્પરેચર માપી શકાય છે. રિમોટથી ચાલતું આ પ્રથમ મશીન ભાવનગર સર ટી હોસ્પિટલને સુપ્રત કરવામાં આવ્યું છે. વિભાવરીબેન દવેના હસ્તે આ મશીન અર્પણ કરવામાં આવ્યું હતું.
આ કોરોના કાળમાં આઇસોલેશન વોર્ડમાં નર્સ તથા મેડિકલ ટીમને મદદરૂપ થાય તેવા સાધનનો આવિષ્કાર ભાવનગરના બે ઇજનેરો દ્વારા કરવામાં આવ્યો છે. જે મશીન રાજ્યકક્ષાના પ્રધાન વિભાવરીબેન દવેના હસ્તે ભાવનગરની સર.ટી.હોસ્પિટલના મેડિકલ વિભાગને અર્પણ કરવામાં આવ્યું હતું.
આ મશીનનું સંચાલન 150 ફૂટની રેન્જ સુધી રીમોટ, મોબાઈલ, તેમજ કેમેરા વડે આઇશોલેશન વોર્ડમાં ફરજ બજાવતા આરોગ્ય કર્મચારી કરી શકે છે. જે દર્દીને દવાઓ, ટિફિન, નાસ્તો, પાણી વગેરે પહોંચાડી શકે છે. તદુપરાંત દર્દીનું થર્મલ ગનથી ટેમ્પરેચર માપી શકે છે તથા પલ્સ તથા ઓક્સિજન લેવલ પણ માપી શકે છે. આ મશીનની અન્ય વિશેષતા એ છે કે તેમાં રહેલા ઇન્ફ્રારેડ સેન્સર કેમેરા તથા સ્પીકર વડે કોરોના ગ્રસ્ત દર્દીને આરોગ્ય કર્મચારી જરૂરી સુચના આપી શકે છે તથા દર્દી પણ તેમની જરૂરિયાત, તકલીફ તેના માધ્યમથી આરોગ્ય કર્મચારીને જણાવી શકે છે.
આમ કોરોનાગ્રસ્ત દર્દીના સીધા સંપર્કમાં આવ્યા વગર જ પૂરેપૂરી કાળજી લઇ શકાય છે તથા આ "રેમોનર્સ" દ્વારા આરોગ્ય કર્મચારીની સલામતી, સંક્રમણની શક્યતા પણ નિવારી શકાય છે. ભાવેણાના ઇજનેર દ્વારા બનાવવામાં આવેલા આ રેમોનર્સનું દાન જીતેન્દ્રરાય સંઘવી તથા પ્રવીણભાઈ પરમાર દ્વારા સર.ટી. હૉસ્પિટલના મેડિકલ વિભાગને કરાયું છે.
રેમોનર્સના લોકાર્પણ પ્રસંગે રાજ્યકક્ષના વિભાવરીબેન દવે ઉપસ્થિત રહ્યા હતા અને મશીનના નિર્માતા રાહુલભાઈ તથા રવિભાઈને લોકસેવાના આ કાર્યમાં મદદરૂપ થવા બદલ અભિનંદન પાઠવતા જણાવ્યું હતું કે, આ રેમોનર્સ દર્દીઓ માટે નર્સની ગરજ સારશે. જેના થકી આઇશોલેશન વોર્ડમાં ફરજ બજાવતા કર્મીઓને કોરોના થવાની સંભાવના પણ ઘટી જશે.
અન્ય કોઈ ખાનગી હોસ્પિટલમાં આ આધુનિક મશીનનું વેંચાણ ન કરી અને સર.ટી.હોસ્પિટલ ખાતે વિનામૂલ્યે આ મશીન ઉપલબ્ધ કરાવી રાહુલભાઈ તથા રવિભાઈએ ભાવનગર પ્રત્યેની તેમની નિષ્ઠા અર્પણ કરી છે. ઉપસ્થિત કોરોના વોરિયર્સ તથા મેડિકલ ટીમને બિરદાવતા જણાવ્યું હતું કે, અનિશ્ચિતતાઓથી ભરેલી આ કોરોના મહામારીમાં પણ આપ સૌએ પ્રસંશનિય ફરજ બજાવી છે.
