ભરૂચઃ જિલ્લામાં દારૂની હેરાફેરીના 4 ગુનામાં વોન્ટેડ નામચીન બૂટલેગર નયન કાયસ્થને જિલ્લા LCBએ ઝડપી પાડ્યો હતો. ભરૂચનો નામચીન બૂટલેગર નયન ઉર્ફે બોબડો કિશોરભાઇ કાયસ્થ દારૂની હેરાફેરીના 4 ગુનામાં વોન્ટેડ હતો. દમણથી વાયા ભરૂચ થઇ વડોદરા સુધી દારૂની હેરાફેરી કરતા વડોદરાના કુખ્યાત બૂટલેગર પરેશ ઉર્ફે ચકાની સાથે નયન લોકડાઉનમાં પણ સક્રિય હતો.
અનલોક શરૂ થતા જ નયન ફરી એક્ટિવ થતા પોલીસ એક્સનમાં આવી ગઇ હતી. પોલીસ મહાનિર્દેશકે પણ લિસ્ટેડ બૂટલેગરને પકડવા માટે સ્પેશિયલ ડ્રાઇવ રાખ્યો હતો. અગાઉ પણ દારૂની હેરાફેરીના ગુનામાં પકડાયેલા બૂટલેગર નયન ઉર્ફે બોબડાને પકડવા માટે LCBની ટીમે ટેકનીકલ સર્વેલન્સથી તપાસ કરી તેને દબોચી લીધો હતો.
અત્રે ઉલ્લેખનિય છે કે, નયન સાથે દારૂના ધંધાની હરીફાઇમાં વડોદરાના બૂટલેગર લાલુ સિંધીને પણ દારૂ સહિત લોકડાઉન પહેલા ગોલ્ડન બ્રિજ પરથી પોલીસે ઝડપી પાડ્યો હતો. લાલુ સિંધીનો પણ હજુ ભરૂચ પોલીસના ચોપડે વોન્ટેડ છે.
