પાલનપુરના મતદારોને EVMથી માહિતગાર કરવા મતદાન નિદર્શન કેન્દ્ર શરૂ કરાયું

બનાસકાંઠા જિલ્લામાં પાલનપુર, ડીસા તેમજ ભાભર પાલિકાની સામાન્ય ચૂંટણી 28 ફેબ્રુઆરીએ યોજાવાની છે, તો થરાદ તેમજ ધાનેરા પાલિકાની પેટા ચૂંટણી અને કાંકરેજ, દાંતીવાડા તાલુકા પંચાયતની પેટા ચૂંટણી માટે તડામાર તૈયારીઓ શરૂ કરી દેવામાં આવી છે. સ્થાનિક સ્વરાજની ચૂંટણીઓમાં મતદારોએ 4 વોટ આપવાના હોવાથી વોટિંગ કરવાની મેથડ સમજાવવા પાલનપુરના જનસેવા કેન્દ્ર ખાતે મતદાન નિદર્શન કેન્દ્ર શરૂ કરાયું છે.

• સ્થાનિક સ્વરાજની ચૂંટણીમાં એક વોર્ડમાંથી 4 ઉમેદવારો ચૂંટાય છે
• મતદારો એક સાથે 4 વોટ આપી શકશે
• મલ્ટી ચોઇસ EVM મશીન દ્વારા વોટિંગ થશે

બનાસકાંઠાઃ જિલ્લામાં સ્થાનિક સ્વરાજની ચૂંટણી સંદર્ભમાં 3 નગરપાલિકાઓની ચૂંટણી તેમજ 2 તાલુકા પંચાયત અને 2 નગરપાલિકાઓની પેટા ચૂંટણી યોજાવાની છે. જે અંતર્ગત જિલ્લાની સૌથી મોટી પાલનપુર નગરપાલિકાની ચૂંટણી પર તમામ લોકોની મીટ મંડરાઇ છે. પાલનપુર પાલિકાના 11 વોર્ડમાંથી 44 બેઠકો માટે ચૂંટણી થવાની છે. જેમાં 1.5 લાખ મતદાતાઓ ઉમેદવારોનું ભાવિ નક્કી કરશે, ત્યારે પાલનપુર પાલિકાના મતદારો ચાર-ચાર વોટ આપી શકશે, પરંતુ કેટલાક નવા મતદારો પ્રથમ વખત જ સ્થાનિક સ્વરાજ્યની ચૂંટણીમાં વોટિંગ કરી રહ્યાં છે. જેથી તેમને માહિતગાર કરવા પાલનપુર જનસેવા કેન્દ્ર ખાતે મતદાન નિદર્શન કેન્દ્ર ઉભું કરાયું છે.

મતદાન નિદર્શન કેન્દ્ર

વોટ આપવાની સંપૂર્ણ માહિતી અપાઈ

પાલનપુર પાલિકા ચૂંટણીનાં મુખ્ય અધિકારી શિવરાજ ગિલવા તેમજ એસ.જે.ચાવડાએ આ મતદાન નિદર્શન કેન્દ્રને ખુલ્લું મતદારોને જણાવ્યું કે, આ મલ્ટી ચોઇસ EVM મશીનમાં કઈ રીતે 4 વોટ આપવા તેની સંપૂર્ણ માહિતી આપવા આ નિદર્શન કેન્દ્ર શરૂ કરાયું છે. જેથી મતદારોને સમજવામાં સરળતા રહેશે.