અંબાજીમાં વૈશાખી પુનમનો મેળો બન્યો રક્તરંજીત, બે જુથ અથડામણમાં 1નું મોત

અંબાજી: યાત્રાધામ અંબાજી ખાતે આજે એટલે કે શનિવારના રોજ વૈશાખી પુનમને લઇ આદીવાસી લોકોનો એક અનોખો મેળો ભરાયો હતો. જેમાં ખાસ કરી આદીવાસી લોકો પોતાની માનતા પુર્ણ કરતાં હોય છે. જેને લઇ અંબાજીમાં હજ્જારોની સંખ્યામાં આદીવાસી લોકો એકત્રીત થયા હતા ને મેળામાં ફરી રહેલાં આદીવાસી લોકોમાં બે જુથ વચ્ચે અચાનક ઘર્ષણ સર્જાતા કોઇક અજાણ્યા શખ્સે એક આદીવાસી યુવકને ગળાનાં ભાગે છરીનાં ઘા મારી હત્યા કરી દેવાતાં મેળો રક્તરજીંત બન્યો હતો ને આદીવાસી લોકોમાં પણ ભારે દોડધામ જોવા મળી હતી.

પ્રાપ્ત વિગતો અનુસાર, બપોરનાં સુમારે અંબાજીનાં મુખ્ય બજારમાં બનેલી ઘટના અંગેની જાણ અંબાજી પોલીસને થતાં પોલીસ તાત્કાલીક ઘટના સ્થળે પહોંચી તપાસ હાથ ધરી હતી. તપાસ દરમિયાન મરનાર યુવકનાં ખીસ્સામાંથી આધારકાર્ડ મળી આવેલ જેનાં આધારે મરનાર શખ્સ અમીરગઢ તાલુકાનાં નાઇવાડા ગામનો હોવાનો જાણવાં મળેલ છે. જેનું નામ કાર્ડનાં આધારે માનાભાઇ ડુંગાઇચા હોવાનું જાણવા મળેલ છે. હાલ તબક્કે મૃતકના મૃતદેહને અંબાજીની કોટેજ હોસ્પીટલમાં ખસેડાવામાં આવ્યો છે.