અમૂલ દ્વારા છેલ્લા ત્રણ વર્ષમાં બીજી વખત દૂધના ભાવમાં વધારો કરાયો છે. દૂધની વેચાણ કિંમતમાં વધારો કરવા પાછળનું કારણ આપતા અમૂલના સત્તાધીશોએ જણાવ્યું હતું કે, પશુ દાણના ભાવમાં ગત વર્ષની સરખામણીમાં 35 ટકાનો વધારો થયો છે. જેથી દૂધ ઉત્પાદન ખર્ચ વધે છે .પરીણામે દૂધના ભાવમાં વઘારો કરવાનો નિર્ણય લેવાયો છે. આમ, પશુદાણ અને ઇનપુટ ખર્ચમાં થયેલા વધારાને ધ્યાને રાખતા દૂધ સંઘ દ્વારા દૂધ ઉત્પાદકોને ચૂકવાતાં દૂધના ભાવમાં ગયા વર્ષની સરખામણીમાં 100થી 110 રૂપિયા પ્રતિકિલો ફેટે ભાવ વધારો કરાયો છે.
અમૂલ દ્વારા કરવામાં આવેલ દૂધ ની વેચાણ કિંમત ભાવમાં અમૂલ ગોલ્ડ 500 ગ્રામનો ભાવ 27 રૂપિયા હતો. જે હવે વધારીને 28 રૂપિયા, અમૂલ તાઝા 500 ગ્રામનો જૂનો ભાવ 21 રૂપિયા હતો. જેમાં વઘારો કરીને 22 રૂપિયા કરાયો છે. અમૂલ સ્પેશિયલ એક લીટર દૂધના પાઉચનો ભાવ 50 રૂપિયા હતો જેને ભાવ 51 રૂપિયા કરવામાં આવ્યો છે. તેમજ amul cow milk 500 ગ્રામ દૂધના પાઉચનો ભાવ વધારીને 23 રૂપિયા કરવામાં આવ્યો છે. આ તમામ ભાવ વધારાનો ગુજરાત, દિલ્હી , પશ્ચિમ બંગાળ, મુંબઇ અને મહારાષ્ટ્રમાં 15 ડિસેમ્બર 2019થી એટલે કે આજથી અમલમાં કરાશે.
ઉલ્લેખનીય છે કે, અમૂલ દ્વારા જ્યારે પણ પશુપાલકોને ભાવ વધારો આપવામાં આવે ત્યારે મીડિયાને ચોક્કસથી જણાવવામાં આવે છે. કારણ કે, પશુપાલકોને પોષણક્ષમ ભાવ આપતી વખતે વધારો આર્થિક બોજો સંસ્થાને ઉઠાવવો પડે છે. આ પહેલાં જ્યારે પશુપાલકોને પોષણક્ષણ ભાવ અપાયા હતાં ત્યારે સંસ્થાને વાર્ષિક 20થી 30 કરોડ રૂપિયાનો બોજો ઉઠાવવો પડ્યો હતો.
આમ, અમૂલ દ્વારા કરાયેલા ભાવ વધારાથી પશુપાલકોમાં ખુશીનો માહોલ જોવા મળી રહ્યો છે. ત્યારે બીજી તરફ ગ્રાહકોમાં મિશ્ર પ્રતિસાદ જોવા મળી રહ્યો છે.
