અમદાવાદઃ કોરોના વાયસરની દહેશત દુનિયાભર જોવા મળી રહી છે અને વાયરસથી બચવા માટે લોકોએ માસ્ક અને સેનિટાઈઝર ઉપયોગ શરૂ કર્યો છે. માસ્ક અને સેનિટાઈઝરના વધુ પડતા ઉપયોગના કારણે બજારમાં તેની અછત જોવા મળી રહી છે, ત્યારે અમદાવાદમાં સામાજિક સંસ્થા દ્વારા ઘેર બેઠા હોમ મેડ માસ્ક બનાવવામાં આવી રહ્યાં છે. તેનું વિનામૂલ્યે વિતરણ કરવામાં આવી રહ્યું છે. આ માસ્ક અન્ય લોકો પણ બનાવી શકે છે. જુઓ વીડિયો.
ઘેર બેઠાં માસ્ક બનાવવાની રીત
ઘેર બેઠાં માસ્ક બનાવવો ખૂબ જ સહેલો છે. જેમાં કોટનના કપડાં, રબર, કપૂર, લવિંગ, અજમો અને સોયદોરાની જરૂર પડે છે. સૌ પ્રથમ કપડાને માસ્ક બનાવવાના આકારમાં કાપવું પડે છે. બાદ તેને એકતરફથી સીવવામાં આવે છે. બીજી તરફથી તેમાં કપૂર, લવિંગ અને અજમો મુકવામાં આવે છે. આ તમામ વસ્તુઓ મૂકીને માસ્કને અન્ય તરફથી પણ સીવી દેવામાં આવે છે. તેના બંને ભાગ પર રબર લગાવીને પહેરી શકાય તે રીતે બનાવવામાં આવે છે. આ રીતે માસ્ક તૈયાર કરી શકાય છે.
રિયુઝેબલ છે આ માસ્ક
માસ્કમાં કપૂર, લવિંગ અને અજમાનો ખાસ ઉપયોગ કરવામાં આવે છે. આ માસ્કની વિશેષતા એ છે કે, આ માસ્કનો માત્ર એકવાર જ નહીં, પરંતુ અનેક વાર ઉપયોગ થઈ શકે છે. માસ્કનો ઉપયોગ કર્યા બાદ તેને એક તરફથી સિલાઈ ખોલી અંદર મુકેલ વસ્તુ બહાર કાઢી ગરમ પાણીમાં ધોઈ દેવું, જેથી તેમાં રહેલા જીવાણુ મરી જાય અને ફરીથી માસ્કમાં નવું કપૂર, અજમો અને લવિંગ મૂકીને સિલાઈ કરી દેવી જોઈએ. આમ માસ્કનો ફરીથી ઉપયોગ કરી શકાય છે.
10000 માસ્ક વહેંચશે એક ખાનગી સંસ્થા
અમદાવાદમાં ખાનગી સંસ્થા દ્વારા 10,000 જેટલા માસ્ક બનાવીને વિતરણ કરવાનું નક્કી કરવામાં આવ્યું છે. જેમાંથી 5000 જેટલા માસ્ક તો વહેંચી દેવામાં આવ્યા છે. જ્યારે અન્ય 5000 રોજેરોજ બનાવીને વિતરણ કરવામાં આવશે.
