લૉક ડાઉનમાં ‘તથાસ્તુ’ શોર્ટ ફિલ્મ હકારાત્મકતાનો સંદેશ આપે છે, જૂઓ વીડિયો

વિશ્વમાં કોરોનાએ હાહાકાર મચાવ્યો છે. ભારત અને તેમાંય ગુજરાતમાં કોરોના પોઝિટિવ કેસની સંખ્યા સતત વધતી જઈ રહી છે. લૉકડાઉન પાર્ટ 3 ચાલી રહ્યો છે. લૉકડાઉનના સંજોગોમાં તમામ લોકો કંટાળી ગયાં છે અને કેટલાક લોકો તો ડીપ્રેશનનો અનુભવ કરતાં હશે. આવા કપરા સંજોગોમાં હકારાત્મક સંદેશ આપતી શોર્ટ ફિલ્મ આપણે પણ જોઈએ.

અમદાવાદ : સાંપ્રત પરિસ્થિતિને ધ્યાનમાં રાખીને પાંચ મીનીટ તેતાલીસ સેકન્ડની(૦૫:૪૩) એક હકારાત્મક ફિલ્મ "તથાસ્તુ" તૈયાર કરી છે. જેનું લેખન અને વાણી ગુજરાતી રંગભૂમિ અને ફિલ્મના જાણીતા કલાકાર મેહુલ બુચના છે. વિઝ્યુલાઇઝેશન અભિલાષ ઘોડાનું છે. કેમેરાવર્ક કરન ઘોડા અને એડીટીંગ વિવેક ઘોડાએ સંભાળ્યું છે. તો આવો નિહાળીએ આ અદભૂત શોર્ટ ફિલ્મ.

આ તકે અભિલાષ ઘોડાએ ETV Bharat સાથેની વાતચીતમાં જણાવ્યું હતું કે તાજેતરમાં લૉક ડાઉનની પરિસ્થિતિમાં સમાચારપત્રો, ટેલિવિઝન ચેનલો અને ચર્ચામાં સતત કોરોના સિવાય કશું જ સાંભળવા નથી મળતું, ત્યારે સતત તણાવની વચ્ચે જીવતાં લોકોમાં એક હકારાત્મક્તાનો સંચાર થાય, લોકો ઇશ્વર પર આસ્થા રાખે તે માટે એક શોર્ટ ફિલ્મ બનાવવાનો વિચાર આવ્યો અને "તથાસ્તુ"ના શીર્ષક તળે આપ સૌને ચરણે મૂકી રહ્યો છું. મને વિશ્વાસ છે કે આ શોર્ટ ફિલ્મ આપને ગમશે જ.