પાક વીમા મુદ્દે રાજ્ય સરકારે બ્લેક લિસ્ટ કંપનીઓની યાદી કેન્દ્ર સરકારને મોકલી

અમદાવાદ: પ્રધાનમંત્રી પાક વીમા યોજનાનો ગુજરાતમાં યોગ્ય અમલ નહીં થઈ રહ્યો હોવાની ફરિયાદ સાથે હાઇકોર્ટમાં મોટી સંખ્યામાં ખેડૂતોએ અરજી કરી છે. જે મામલે રાજ્યસરકારે હાઇકોર્ટમાં એફિડેવિટ રજૂ કર્યું હતું. જેમાં પાકના નુકસાનને લઈ વળતર ચૂકવવું જોઈએ તેમજ હાઇકોર્ટના આદેશ મુજબ વીમા કંપનીઓનું એક બ્લેક લિસ્ટ તૈયાર કરી કેન્દ્ર સરકારમાં મોકલવામાં આવ્યું છે.

આ મામલે હાઇકોર્ટે વીમા કંપનીને 17મી ડિસેમ્બર સુધીમાં જવાબ રજૂ કરવાનો આદેશ કર્યો હતો. ખેડૂતોએ કરેલી અરજીમાં રજૂઆત કરવામાં આવી છે કે, વર્ષ 2017-18માં ખેડૂતોને પાક વીમાનો લાભ મળ્યો નથી. ખેડૂતોની હાઈકોર્ટમાં રજૂઆત હતી કે, પાક નિષ્ફળ જાય ત્યારે યોગ્ય સર્વેના અભાવે તેમને પાક વીમાના પૈસા મળતા નથી અને સર્વેના થયો હોય ત્યાં સુધી તેઓ અન્ય પાક લે તો પાક વીમો ના મળે તેવી પરિસ્થિતિનો ખેડૂતો સામનો કરી રહ્યાં છે.

લોન લેતી વખતે પાક વીમાના પ્રીમિયમના પૈસા તો કાપી લેવાય છે, પરંતુ પાક નિષ્ફળ જાય અને ચૂકવણી કરવાની આવે ત્યારે ઇન્શ્યોરન્સ કંપનીઓ ઠાગાઠૈયા કરે છે. જે બાબતને ધ્યાનમાં રાખીને હાઈકોર્ટે કેન્દ્ર અને રાજ્ય સરકાર, ઇન્સ્યોરન્સ કંપની, કૃષિ વિભાગ સહિતના પક્ષકારોને નોટીસ ઇશ્યુ કરી હતી.