અમદાવાદમાં ડોનાલ્ડ ટ્રમ્પના આગમનને લઈને CAAના વિરોધ માટે આવેલા લોકોને પરત મોકલાયા

CAA અને NRCનો વિરોધ દેશભરમાં હજુ યથાવત છે, ત્યારે મંગળવારે ગાંધી આશ્રમ ખાતે અલગ અલગ સંગઠનના લોકો વિરોધ કરવા માટે એકઠા થયા હતા, ત્યાંથી પોલીસે 25 તારીખ સુધી VIP મુવમેન્ટ હોવાનું કહીને પરત મોકલ્યા હતા.

અમદાવાદ : શહેરના ગાંધી આશ્રમ ખાતે જુદા જુદા વિદ્યાર્થી સંગઠનો, સામાજિક સંસ્થાઓ એકઠી થઈ હતી. ગત રાતે આ સંગઠન દ્વારા વિરોધ માટેનો કોલ અપાયો હતો. જેથી ગાંધી આશ્રમ ખાતે લોકો એકઠા થવાના શરૂ થયા હતા. 5 વાગ્યાથી 7 વાગ્યા સુધી લોકો બેનર સાથે શાંતિપૂર્ણ રીતે વિરોધ કરવાના હતાં.

આ વિરોધ કરવાની જાણ પોલીસને થતા રાણીપ પોલીસ પણ ઘટના સ્થળે પહોંચી અને વિરોધ કરવા આવેલા લોકોને VIP મુવમેન્ટ હોવાનું કહી પરત મોકલ્યા હતા. જ્યારે વિદ્યાર્થીઓનો આક્ષેપ હતો કે, તેમને ગઈકાલ રાતની પરવાનગી માગી છે અને પોલીસનું કહેવું છે કે, મંગળવારે બપોરે 1-30 કલાકે પરવાનગી માટે અરજી આવી છે. જેથી પરવાનગી આપવામાં આવી નથી. અમેરિકી પ્રમુખ ડોનાલ્ડ ટ્રમ્પ અમદાવાદ આવતા હોવાને લઇ અત્યારથી જ લોકોને વિરોધ માટેની પરવાનવી આપવામાં આવી નથી.