દાણીલીમડા વોર્ડના કોંગ્રેસના કૉર્પોરેટર જમનાબેન વેગડા રવિવારે રાત્રે 'હેલ્લારો' ફિલ્મ જોવા ગયા હતા. ફિલ્મમાં એક ઢોલી ગામમાં આશરો લેવા ગામના મુખીને મળી અને જોશમાં ઢોલ વગાડે છે. મુખી તેના માણસને ઘી આપી રવાના કરવા કહે છે, પરંતુ ઢોલી તેને ઘી નહીં પણ આશરો લેવા આવ્યો હોવાનું કહે છે. જેથી મુખી ઢોલીને નામ પૂછતાં મૂળજી કહે છે. મુખીએ મૂળજી એટલે કેવા એમ પૂછ્યું હતું. જેથી ઢોલીએ પોતે એક ચોક્કસ જાતિના હોવાનું કહ્યું હતું.
કોંગ્રેસના કોર્પોરેટર જમનાબેન વેગડાનો આક્ષેપ છે કે, 'ફિલ્મમાં સરકાર દ્વારા પ્રતિબંધિત કરવામાં આવેલા શબ્દનો ઉલ્લેખ કરી જાતિનું અપમાન કરવામાં આવ્યું છે. જાતિને અપમાનિત કરે તેવા શબ્દોનો પ્રયોગ કરાયો છે.' આ મુદ્દે 'હેલ્લારો' ફિલ્મના દિગ્દર્શક અભિષેક શાહ, ડાયરેક્ટર આશિષ સી. પટેલ, નીરવ સી. પટેલ, આયુષ પટેલ, મિત જાની, પ્રતિક ગુપ્તા, ડાયલોગ લખનાર સૌમ્ય જોશી સામે ફરિયાદ નોંધાવાઈ છે. પોલીસે ફરિયાદ નોંધી કાર્યવાહી હાથ ધરી છે.
