આશરે 200 વર્ષ પહેલા હનુમાનદાસજી મહારાજે ખેતરમાં હનુમાન દાદાની મુર્તિની સ્થાપના કરી હતી અને ત્યારબાદ જગન્નાથ મંદિરની સ્થાપના કરવામાં આવી હતી. વર્ષ 1887માં નરસિંહ દાસજી મહારાજની પ્રેરણાથી સૌપ્રથમ રથયાત્રાનું આયોજન કરવામાં આવ્યું હતું. તો આવો જાણીએ આ મંદિર વિશે ટ્રસ્ટીનું શું કહેવું છે.
જગન્નાથ મંદિરના સૌપ્રથમ મહંત હનુમાનદાસજી 95 વર્ષની ઉંમરે બ્રહ્મલીન થયા ત્યારબાદ અનુક્રમે સારંગદાસજી, બાગમુકુંદદાસજી, નરસિંહદાસજી, સેવાદાસજી, મહામંડલેશ્વર રામહર્ષાસજી, રામેશ્વરદાસજી ગાદીપતિ બન્યા હતા. હાલ દિલિપદાસજી ગાદીપતિ તરીકે મંદિરની જવાબદારી સંભાળી રહ્યા છે.
નરસિંહદાસજીની પ્રેરણાથી સૌ પ્રથમ રથયાત્રા 2 જુલાઈ 1878માં યોજાઈ હતી. વર્ષોથી પરંપરાગત રુટ પરથી જ રથયાત્રા અમદાવાદના શહેરોમાંથી નીકળે છે. સૌપ્રથમ રથયાત્રા બળદગાડામાં નિકળી હતી. વર્ષ 1879માં સર્વ પ્રથમવાર સરસપુરમાં ભગવાનનું મોસાળું કરવામાં આવ્યું હતું. તે સાથે જ ભગવાન જગન્નાથજી તેમના ભાઈ બલરામજી અને બહેન સુભદ્રાજી સાથે નગરચર્યા પર નીકળે છે. ભગવાન જગન્નાથજીના રથનું નામ નંદિઘોષ, બલરામજીના રથનું નામ તલદ્વજ અને સુભદ્રાજીના રથનું નામ કલ્પદ્વજ છે.
વર્ષોથી જગન્નાથ મંદિરમાં શ્રદ્ધાળુઓ આવે છે. રથયાત્રામાં દેશ-વિદેશથી લોકો જોડાય છે અને ભગવાનના દર્શન કરે છે. 24 કિલોમીટર લાંબા રથયાત્રા રુટ પરથી ભગવાનના રથો નીકળે છે ત્યારે અમદાવાદ જય જગન્નાથના નાદ સાથે ગુંજી ઉઠે છે.
