ગુજરાત ક્રિકેટ એસસોશિયેશન દ્વારા આંતરરાષ્ટ્રીય મેચની વ્યવસ્થા ધંધાકીય પ્રવૃત્તિ નથી: હાઇકોર્ટ

અમદાવાદ: ગુજરાત ક્રિકેટ એસોસિએશન નફો રળવા માટે કમર્શિયલ પ્રવૃતિઓને પ્રોત્સાહન આપતું હોવાના આક્ષેપ સાથે તેના ચેરીટેબલ ટ્રસ્ટને ઇન્કમટેક્ષ એકટ 1960ની સેક્શન 12A હેઠળ આવકવેરામાં મળતી છૂટને રદ કરવાની માગ સાથે આવકવેરા વિભાગ દ્વારા દાખલ કરવામાં આવેલી અપીલ અરજી મુદ્દે ગુજરાત હાઇકોર્ટના જસ્ટિસ જે.બી.પારડીવાલા અને એ.સી. રાવની ખંડપીઠે રિટ ફગાવતા મહત્વનું અવલોકન કરતાં નોંધ્યું હતું કે ગુજરાત ક્રિકેટ એસોસિયેશનની પ્રવૃત્તિઓમાં નફો રળવાનો હેતુ દેખાઈ આવતું નથી. GCAની પ્રવૃત્તિઓથી કેટલાક અંશ સુધી ક્રિકેટર અથવા ક્રિકેટની રમતને ફાયદો થાય છે. પરંતુ, સંસ્થા ક્રિકેટરો પાસેથી કોઈ ફી કે પૈસા લેતી નથી.

હાઇકોર્ટની ડિવિઝન બેન્ચે નોંધ્યું હતું કે, ગુજરાત ક્રિકેટ એસોસિએશન દ્વારા ધણીવાર એક્ઝિબિશન કે ચેરિટી મેચનું આયોજન કરવામાં આવે છે. પરંતુ, તે કોઈપણ પ્રકારની ટ્રેનિંગ આપતુ નથી. એક્ઝિબિશન મેચ સિવાય એસોસિયેશન બીજી કોઈ ખાસ પ્રવૃત્તિ કરતુ નથી. આવકવેરા વિભાગ દ્વારા વર્ષ 1984માં ગુજરાત ક્રિકેટ એસોસિએશનની પ્રવૃત્તિઓના આધારે તેને સેક્શન 12A હેઠળ આવકવેરામાં છૂટ આપવામાં આવી હતી અને અચાનક એસેસિંગ અધિકારીના રિપોર્ટ બાદ આવકવેરા વિભાગના નિર્દેશક GCAને મળેલી સેક્શન 12A હેઠળની મંજૂરી રદ કરી શકે નહિ.

આ મુદ્દે આવકવેરા વિભાગના વકીલ એમ.આર. ભટ્ટે દલીલ કરી હતી કે, આવકવેરા વિભાગ દ્વારા ગુજરાત ક્રિકેટ એસોસિયેશનની section 12A હેઠળ આપવામાં આવેલી મંજૂરીને રદ કરવાનો નિર્ણય યોગ્ય છે. GCAને આઈસીસીમાંથી, ટિકિટોના વેચાણ અને આંતરરાષ્ટ્રીય મેચનું આયોજન કરવા બદલ આવક મળે છે. જેથી સેક્શન 2(15) હેઠળ નોંધણી રદ કરવાનો આદેશ બરાબર છે.

આ મુદ્દે ગુજરાત ક્રિકેટ એસોસિયેશનના વકીલ જે.પી. શાહે રજુઆત કરી હતી કે, ITATનો આવકવેરા વિભાગના આદેશને રદ કરવાનો નિર્ણય યોગ્ય છે. GCAની નોંધણી કરવામાં આવી ત્યારબાદથી આજ દિવસ સુધી તેના હેતુમાં કોઈ જ પ્રકારનો ફેરફાર કરવામાં આવ્યો નથી. ગુજરાત ક્રિકેટ એસોસિયેશનને થતી તમામ પ્રકારની આવકનો ઉપયોગ સભ્યોના અંગત હેતુ માટે નહિ પરંતુ ક્રિકેટ અને તેની સાથે સંકળાયેલી વ્યવસ્થાના પ્રોત્સાહન માટે કરવામાં આવે છે.

આ સમગ્ર કેસની વિગત એવી છે કે, એસેસિંગ ઓફિસરના રિપોર્ટ બાદ આવકવેરા વિભાગના નિર્દેશકે ગુજરાત ક્રિકેટ એસોસિયેશનને 1984માં સેક્શન 12A હેઠળ આવકવેરામાં આપવામાં આવેલી કેટલીક છૂટની મંજૂરી અચાનક જ રદ કરી દીધી હતી. આવકવેરા વિભાગના આદેશ સામે ગુજરાત ક્રિકેટ એસોસિયેશનને 2005માં ઇન્કમટેક્સ એપેલેટ ટ્રિબ્યુનલમાં (ITAT) અરજી દાખલ કરી હતી. વર્ષ 2012માં ITATએ GCAના પક્ષમાં ચુકાદો આપતા આવકવેરા વિભાગ દ્વારા ગુજરાત હાઇકોર્ટમાં અપીલ અરજી દાખલ કરવામાં આવી હતી.