AMC કમિશ્નરના આદેશ વિરુદ્ધ પિટિશન કરશે હાઇકોર્ટના વકીલ

અમદાવાદ મ્યુનિસિપલ કોર્પોરેશનના નવનિયુક્ત ઇન્ચાર્જ કમિશ્નર મુકેશ કુમાર દ્વારા અચાનક જ જીવન જરૂરિયાતની વસ્તુઓ એવી કરિયાણા અને શાકભાજી તેમ જ ફળોના વેચાણ પર પ્રતિબંધ મૂકી દેવામાં આવ્યો. તેને લઈને શહેરમાં ભારે અરાજકતા સર્જાઈ હતી. આવા આદેશ સામે હાઈકોર્ટના વકીલે બાંયો ચડાવી છે.

અમદાવાદઃ ઇન્ચાર્જ કમિશ્નરે કરેલા આદેશના પગલે સાંજના સમયે ચીજવસ્તુઓની ખરીદી કરવા માટે લોકોએ રસ્તા ઉપર ઉતરીને લાઇનોમાં ઊભા રહેવું પડ્યું હતું. પરિણામે ભીડ પણ સર્જાઈ હતી. જેથી કોરોના વાઇરસ ફેલાવવાની શક્યતા પણ વધી ગઈ હતી. સ્થાનિક વહીવટી તંત્રના આ નિર્ણયને કેટલાક બુદ્ધિજીવીઓએ વખોડી કાઢયો હતો. તેમનું કહેવું છે કે સૌ પ્રથમ તો બંધારણના આર્ટીકલ-21 પ્રમાણે જીવન જરૂરિયાતની ચીજવસ્તુઓથી નાગરિકોને વંચિત કરી શકાય નહીં.