શહેરના નિકોલ વિસ્તારમાં રહેતી ચેતનાની દોઢ વર્ષ પહેલાં રાકેશસિંહ ભિમસિંહ બિહોલા સાથે ઘી કાંટા કોર્ટમાં પ્રેમ લગ્ન કર્યા હતા. ત્યારબાદ વડોદરા ખાતે ધંધા માટે ગયા હતા અને ત્યાં રોકાયા હતા. છેલ્લા ત્રણ મહિનાથી તેઓ નિકોલમાં રહેતા હતા.
રાકેશસિંહ પર વકીલનો ફોન આવ્યો હતો અને જેમાં ચેતનાને જાણવા મળ્યું હતું કે, પતિ રાકેશે અગાઉ રિટા સાથે લગ્ન કર્યા હતા. જેથી આ બાબતે ચેતનાએ પતિ સાથે ચર્ચા કરતા પતિએ લગ્ન ન કર્યા હોવાનું જણાવ્યું હતું. 7 જૂનના રોજ ચેતના નોકરી જતી હતી. ત્યારે પતિ રાકેશ પણ કામ માટે બહાર જવા નિકળ્યો હતો. આ દરમિયાન પતિના મોબાઇલ પર ફોન આવતા તે ઘરે જ રોકાઇ ગયો હતો અને કહ્યું હતું કે, આરામ કરી સાંજે કામે જઇશે. બપોરે ચેતનાએ રાકેશને ફોન કરતા ફોન બંધ આવતા તે ઘરે ગઇ હતી. ત્યારે પતિની ગાડી ઘરે પડી હતી. પરંતુ પતિ ઘરે ન હતો. જેથી ચેતનાએ આસપાસના લોકોને પુચ્છા કરતાં જાણવા મળ્યું હતું કે, થોડા સમય પહેલાં જ રાકેશ થેલો લઇ ક્યાંક જતો રહ્યો છે. જેથી ચેતનાએ ઘરમાં જઇ તપાસ કરી હતી. ત્યારે ખબર પડી હતી કે, કબાટમાંથી સોનાની છ તોલાની બંગળીઓ, અઢી તોલાનો સોનાનો સેટ, મોબાઇલ ફોન અને રોકડ 60 હજાર ગુમ હતા.
સમગ્ર ઘટનાની જાણ ચેતનાએ પોલીસને કરતા નિકોલ પોલીસ ઘટના સ્થળે દોડી આવી હતી. અને રાકેશસિંહ ભિમસિંહ બિહોલા સામે લગ્ન કર્યા હોવા છતા બીજા લગ્ન કરવા અંગે વિશ્વાઘાતની ફરિયાદ નોંધાવી છે.
