અમદાવાદ શહેરના અંજલી બ્રિજ પર મુંબઈના વેપારી પાસેથી 65 લાખના સોનાની લૂંટના ગુનામાં ક્રાઈમ બ્રાન્ચે પૂર્વ હોમગાર્ડ જવાન સહિત 3 આરોપીઓની ધરપકડ કરી હતી. જેમાં ઝડપાયેલા પૂર્વ હોમગાર્ડ જવાન ઘનશ્યામ શ્રીમાળીએ અન્ય આરોપીઓ અહેમદ પઠાણ અને ઇકબાલ શેખ સાથે મળી સમગ્ર લૂંટનું પ્લાનિંગ કર્યું હતું. આ મામલે ક્રાઇમ બ્રાન્ચે બાતમીના આધારે દાણી લીમડાના કાશીરામ વિસ્તારમાંથી પૂર્વ હોમગાર્ડ જવાન ઘનશ્યામ શ્રીમાળી, અહેમદ પઠાણ અને શાહરુખ શેખની ધરપકડ કરી લૂંટમાં સોનાનો મુદ્દામાલ કબજે કર્યો હતો.
આ કેસમાં વિગત એવી હતી કે, મુંબઈમાં રહેતા નવીનભાઈ સિંધવી ગત ગુરુવારે સોનું લઈને બસમાં અમદાવાદ આવતા હતા. નારોલ શાસ્ત્રી બ્રિજ પાસે બસ રોકી પોલીસે તપાસ કરી હતી. પોલીસે તપાસ કરતા નવીનભાઈ પાસે મોટા પ્રમાણમાં સોનું મળી આવ્યું હતું. જેના પુરાવા પણ પોલીસને આપ્યા હતા. તેમ છતાં પોલીસે નવીનભાઈના સમાનની ચકસાણી કરી હતી. જે દરમિયાન ત્યાં હાજર પૂર્વ હોમગાર્ડ ઘનશ્યામની નજર પડી હતી અને તેને તેના સાથીઓ સાથે મળીને લૂંટનો પ્લાન ઘડ્યો હતો.
ઘનશ્યામના બે સાથી અહેમદ અને ઇકબાલ પ્લાન મુજબ વાસણા પહોંચ્યા હતા. અને ચેકિંગના બહાને નવીનભાઈ પાસે બ્રિજ પર ઉભા રહ્યા હતા. અને સમાનની ચકાસણી કરવા કહ્યું હતું. જે અંગે શંકા જતા નવીનભાઈએ ના પાડી હતી. જેથી તેમની પાસેના 2 દાગીનના બોક્સ લઇને ઈસમો નાસી ગયા હતા.
આ મામલે ક્રાઈમ બ્રાન્ચે 4 અલગ અલગ ટીમ બનાવી તપાસ શરૂ કરી હતી. અને 3 આરોપીઓને ઝડપી પાડ્યા હતા. અને લૂંટના 65 લાખના દાગીના પૈકી 62 લાખથી વધુના દાગીના કબ્જે કર્યા હતા. ઉપરાંત આ કેસમાં નવીનભાઈ પાસે નારોલમાં તોડ કરનાર 1 કોન્સ્ટેબલ અને 3 હોમગાર્ડ જવાન વિરુદ્ધ નારોલ પોલીસ સ્ટેશનમાં ફરિયાદ નોંધવામાં આવી છે. એટલે કે, સમગ્ર મામલે 2 ફરિયાદ નોંધવામાં આવી હતી. જેના કુલ 7 આરોપી છે.
