અમદાવાદ: ભાજપની પ્રદેશ કારોબારી બેઠક આજે બુધવારે કમલમમાં મળી છે. જેમાં સીએમ ભૂપેન્દ્ર પટેલ અને પ્રદેશ પ્રમુખ સી.આર. પાટીલની અધ્યક્ષતામાં 9 સાલ બેમિસાલ પર ચર્ચા થઈ હતી. મોદી સરકારે 2014માં દેશની ધૂરા સંભાળી હતી. તેને નવ વર્ષ પુરા થયા છે. નવ વર્ષમાં મોદી સરકારે કરેલા વિકાસના કામો અને મોદી સરકારની યોજનાઓને મતદારો સુધી લઈ જવાની યોજના છે.
ભાજપની ત્રણ દિવસ ચિંતન શિબિર: તેમજ ભાજપ દ્વારા સ્ટેચ્યૂ ઓફ યુનિટી ખાતે 19 મેથી 21 મે 2023 એમ ત્રણ દિવસની ચિંતન શિબિર યોજાશે. જેમાં પણ ગુજરાત ભાજપ અને મોદી સરકારના 9 વર્ષના વિકાસના કામોની ગાથા પર ચર્ચા કરાશે, અને તેને કેવી રીતે પ્રજા સુધી પહોંચાડવી તે અંગે સ્ટ્રેટેજી ઘડાશે. કર્ણાટકમાં ભાજપની હાર પછી ગુજરાત પ્રદેશ ભાજપ હવે સ્હેજ પણ કચાશ રાખવા માંગતી નથી. અને વધુ સક્રિય થઈને પ્રજા વચ્ચે રહેવું.
પરિણામ પર પણ ચર્ચા: ગુજરાત વિધાનસભાની ચૂંટણી ડિસેમ્બર 2022માં યોજાઈ હતી. જેના પરિણામ પર પણ ચર્ચા થનાર છે. ભાજપ 156 બેઠક જીતીને રેકોર્ડ સર્જ્યો છે અને નવો ઈતિહાસ પણ બનાવ્યો છે. તેમ છતાં હજી ભાજપ કયા વિસ્તારોમાં પાછળ રહ્યો અને ત્યાં કયા કારણોસર હાર થઈ તેની ચર્ચા પણ જરૂરી બને છે. તે પહેલા આપણે ગુજરાત વિધાનસભાના પરિણામો પર એક નજર કરીએ.
વિધાનસભામાં હારેલી બેઠકોની સમીક્ષા: પોરબંદર લોકસભા બેઠક પર વિધાનસભાની કુલ 7 બેઠક આવે છે. જેમાં 4 બેઠક પર ભાજપ જીત્યું. બે બેઠક પર કોંગ્રેસ અને 1 બેઠક સમાજવાદી પાર્ટીને ગઈ હતી. પોરબંદરની વિધાનસભા બેઠક પર કોંગ્રેસના અર્જુન મોઢવાડિયા 8,181 મતથી જીત્યા હતા. માણાવદર બેઠક પર કોંગ્રેસના ઉમેદવાર 3,453 મતથી જીત્યા હતા. અને કુતિયાણામાં સમાજવાદી પાર્ટીના ઉમેદવાર કાંધલ જાડેજા 26,712 મતથી જીત્યા હતા. આમ પોરબંદર, માણાવદર અને કુતિયાણા બેઠક પર ભાજપે મહેનત કરવી પડશે.
બનાસકાંઠામાં ભાજપ માટે પડકાર: બનાસકાંઠા લોકસભા બેઠક પર વિધાનસભાની કુલ 7 બેઠક છે. જેમાં વિધાનસભાની ચૂંટણીના પરિણામ પર એક નજર કરીએ તો 4 બેઠક પર ભાજપ, 2 બેઠક પર કોંગ્રેસ અને 1 બેઠક પર અપક્ષ જીત્યા હતા. વાવમાં કોંગ્રેસના ગેનીબહેન ઠાકોર 15,601 મતથી જીત્યા હતા. દાંતામાં કોગ્રેસના ઉમેદવાર 6,327 મતથી જીત્યા હતા. તેમજ ધાનેરામાં અપક્ષ ઉમેદવાર માવજીભાઈ દેસાઈ 35,696 મતથી જીત્યા હતા. આમ વાવ, દાંતા અને ધાનેરામાં ભાજપે લોકસભાની ચૂંટણી જીતવા માટે મહેનત કરવી પડશે.
પાટણમાં ભાજપને મોટુ નુકસાન: પાટણ લોકસભાની બેઠકમાં વિધાનસભાની કુલ 7 બેઠક છે. જેમાં વિધાનસભાની ચૂંટણીના પરિણામમાં 3 બેઠક ભાજપ અને 4 બેઠક કોંગ્રેસ જીત્યું હતું. પાટણમાં કોંગ્રેસના ઉમેદવાર 17,177 મતથી જીત્યા હતા. વડગામમાં કોંગ્રેસના ઉમેદવાર જીગ્નેશ મેવાણી 4,928 મતથી જીત્યા હતા. કાંકરેજમાં કોંગ્રેસના ઉમેદવાર 5,295 મતથી જીત્યા હતા. ચાણસ્મા બેઠક પર કોંગ્રેસના ઉમેદવાર 1,404 મતથી જીત્યા હતા. આમ પાટણ, વડગામ, કાંકરેજ અને ચાણસ્મા વિધાનસભા ક્ષેત્રમાં ભાજપે લોકસભા જીતવા માટે વધુ મહેનત કરવી પડશે.
'ભાજપની પ્રદેશ કારોબારી અને ચિંતન શિબિરએ ચૂંટણી પ્રચાર અને કાર્યકર્તાઓની સાથે તેમજ પ્રજા સાથે એટેચમેન્ટ રહે તેના ભાગરૂપની એક્સરાઈઝ છે. નેતાઓ હોય કે કાર્યકર્તા પ્રજા વચ્ચે દેખાતા રહેવા જોઈએ. તેવી ગણતરી સાથે ભાજપ કોઈને કોઈ અભિયાન કે નવા કાર્યકર્મો આપે છે. અને ખાસ કરીને કર્ણાટકની ચૂંટણીના પરિણામ પછી હવે ભાજપ બીજા રાજ્યોમાં વધુ મહેનત કરશે અને સ્ટ્રેટેજિકલી આગળ વધશે.' -પાલા વરુ, રાજકીય નિષ્ણાત
આણંદની બે વિધાનસભા બેઠકો કોંગ્રેસી: લોકસભાની આણંદ બેઠક પર વિધાનસભાની કુલ 7 બેઠક છે. જેમાં 5 બેઠક પર ભાજપ અને બે બેઠક પર કોંગ્રેસની જીત થઈ હતી. ખંભાતમાં કોંગ્રેસના ઉમેદવાર 3,711 મતથી જીત્યા હતા અને આંકલાવમાં કોંગ્રેસના અમિત ચાવડા 2,729 મતથી જીત્યા હતા. આમ ભાજપે ખંભાત અને આંકલાવને કબજે કરવા માટે ભારે પ્રચાર સાથે મહેનત કરવી પડશે. અને વધુ ફોક્સ કરવું પડશે.
અમદાવાદ પશ્ચિમ બેઠક પર ફોક્સ જરૂરી: અમદાવાદ પશ્ચિમમાં વિધાનસભાની 7 બેઠકમાંથી 5 ભાજપ અને 2 કોંગ્રેસ જીતી હતી. જમાલપુર ખાડિયામાં કોંગ્રેસના ઉમેદવાર 13,658 મતથી જીત્યા હતા. દાણીલીમડામાં કોંગ્રેસના ઉમેદવાર 13,487 મતથી જીત્યા હતા. આમ લોકસભાની બેઠક જીતવા માટે જમાલપુર ખાડિયા અને દાણીલીમડા વિસ્તારમાં ભાજપે નવેસરથી સ્ટ્રેટેજી બનાવવી પડશે.
સૌથી ઓછા માર્જિનથી જીતવાળી બેઠક: લોકસભાની તમામ બેઠકો રેકોર્ડબ્રેક માર્જિનથી જીતવા માટે તાજેતરમાં થયેલી વિધાનસભાની બેઠકના પરિણામનો અભ્યાસ કરવો જરૂરી છે. જેમાં સૌથી ઓછા માર્જિનથી જીતેલા ભાજપના ઉમેદવારોની બેઠક અને તે વિસ્તાર કયો છે, તે જાણવા જરૂરી છે. પ્રદેશ ભાજપ દ્વારા આ મુદ્દા પર કામ શરૂ કર્યું છે.
આ બેઠક પર ભાજપે ફોક્સ કરવું પડશે: કચ્છના રાપર, ઉત્તર ગુજરાતની સિદ્ધપુર, સુરેન્દ્રનગરથી દસાડા, સૌરાષ્ટ્રનું સાવરકુંડલા અને મધ્યગુજરાતના લિમખેડા બેઠક પર ભાજપને સૌથી ઓછા માર્જિનથી જીત મળી હતી. માટે લોકસભામાં રેકોર્ડબ્રેક માર્જિનથી જીત મેળવવી હોય તો આ પાંચ બેઠકો પર ભાજપે વધુ ફોક્સ કરવું પડશે.
'ભાજપ જીતી જાય પછી પણ બીજી ચૂંટણીમાં જીત મેળવવા માટે તૈયારીઓમાં કે પ્લાનિંગમાં લાગી જતી હોય છે. આ એક સંગઠનની પ્રક્રિયાનો એક ભાગ જ હોય છે. કર્ણાટકની ચૂંટણીના હારના પરિણામ પછી ભાજપ હવે કોઈ કચાશ રાખવા માંગતું નથી. તેમજ લોકસભાની ચૂંટણી પહેલા અન્ય પાંચ રાજ્યોની વિધાનસભાની ચૂંટણી આવી રહી છે, જો તેમાં વિપરીત પરિણામ આવે તો કોંગ્રેસમાં જીતનો નવો આશાનો સંચાર થઈ શકે છે, માટે ભાજપ અગાઉથી જ તૈયારીઓમાં લાગી ગયું છે. બીજુ લોકસભા જીતવા માટે રામમંદિર અને નવા સંસદભવનનું લોકાર્પણ જેવા બે રાષ્ટ્રીય મુદ્દા પર પ્રચાર કરશે, હાલ તેવું લાગી રહ્યું છે.' -દિલીપભાઈ ગોહિલ, રાજકીય તજજ્ઞ
11 બેઠકો ભાજપનો ગઢ: આમ ગુજરાતની 11 વિધાનસભા બેઠકો એવી છે કે જે ભાજપનો ગઢ છે. ત્યાંથી લોકસભામાં રેકોર્ડબ્રેક માર્જિનથી જીત થઈ શકે છે. તેમ છતાં ભાજપે આ બેઠકવાળા વિસ્તારોમાં કનેક્ટ તો રહેવું જ પડશે.
આમ આદમી પાર્ટી જ્યાં જીતી ત્યાં જોર લગાવવું પડશે: આમ આદમી પાર્ટીએ ગુજરાતમાં પાંચ બેઠકો જીતી હતી. જેમાં જામજોધપુર, વિસાવદર, ગારીયાધાર, બોટાદ અને દેડિયાપાડામાં આપએ પગપેસારો કર્યો હતો. ભાજપ માટે આ પાંચ બેઠકો પર કબજો જમાવવા માટે વધુ જોર લગાવવું પડશે અને મતદારોના મન બદલવા પડશે તેના માટે સ્ટ્રેટેજિકલી પ્રચારના મેદાનમાં આવવું પડશે.
