અમદાવાદ: 20 એપ્રિલે સિવિલ હોસ્પિટલમાં 108 એમ્બ્યુલન્સમાં એક દર્દીને લાવવામાં આવ્યો હતો. આ એમ્બ્યુલન્સમાં દર્દીને શંકાસ્પદ પોઝિટિવ હોવાનું માનીને સિવિલ હોસ્પિટલમાં દાખલ કરવામાં આવ્યો હતો.
દર્દીની સાથે ત્રણ માસૂમ બાળકો પણ હતા. ૩ વર્ષની નાની જાનકી, ૬ વર્ષનો શૈલેષ અને અરૂણ દંતાણી નામના આ ત્રણ માસૂમ બાળકોના પિતાને તો સારવાર માટે દાખલ કરી દેવાયા. આ નિરાધાર બાળકો કોરોના માટેની ખાસ હોસ્પિટલના પ્રાંગણમાં રાત્રે એકલા રમી રહ્યા હતા. લઘર- વઘર પહેરવેશ, માથું ઓળ્યા વગરના વાળ અને ભૂખથી નંખાઇ ગયેલા ચહેરા તેમની હાલતની ચાડી ખાતા હતા. એક ક્ષણનો પણ વિચાર કર્યા વગર સિવિલ હોસ્પિટલના બાળકોના ખાસ બનાવાયેલા વોર્ડમાં આ બાળકોને ટ્રાન્સફર કરી તેમની મેડિકલ તપાસ કરતાં તેઓમાં કોરોનાના કોઇ લક્ષણો જણાયા ન હતા.
નિરાધાર બાળકો માટે સિવિલ તંત્ર જાણે પાલક માતા પિતાની ફરજ બજાવી...
બાળકોને ભોજન, રમવા માટે રમકડાં, પીવા માટે જ્યુસ એમ ત્રણ દિવસ સુધી આ બાળકોની કાળજી અને સેવા સુશ્રુષા સિવિલ તંત્ર દ્વારા કરવામાં આવી હતી. અમદાવાદના અસારવા ખાતે આવેલ સિવિલ હોસ્પિટલમાં સિવિલ હોસ્પિટલનો સ્ટાફે કે જે 24*7 કોરોનોની સારવાર વચ્ચે પણ તેમની સંવેદના નથી ગુમાવી.તે વાતની પ્રતિતી આ બાળકો સાથેના વર્તનથી જણાય છે.
આ બાળકોને પિતા સિવાય પરિવારમાં કોઈ પણ નથી અને પિતા પણ કોરોનાના લીધે સિવિલમાં દાખલ છે તેવા સમયે આવા બાળકો નોંધારા બની ગયા હતા. તેવા સમયે સિવિલ હોસ્પિટલના સ્ટાફે આ બાળકોની ત્રણ દિવસ સુધી પાલક માતા-પિતા બનીને જે સધિયારો આપ્યો છે, તેનું વર્ણન શબ્દોમાં કરી શકાય તેમ નથી.
