મુંબઈ : અભિનવ બિન્દ્રાએ ગુરૂવારે કહ્યું કે, ભારત પોતાની અત્યાર સુધીની સૌથી મજબૂત ટીમ સાથે ટોક્યો ઑલિમ્પિકમાં શૂટીંગના પ્રબળ દાવેદારના રૂપે ઉતરશે. જો રેંકિન્ગની યાદીને જોવામાં આવે તો, આપણા ઘણા શૂટરો દુનિયાના એક અથવા 2 અને 3 નંબરે છે.
ભારત માટે ઑલિમ્પિકમાં એકમાત્ર વ્યક્તિગત ગોલ્ડ મેડલ વિજેતા બિન્દ્રાએ જણાવ્યું કે, ઘણી સ્પર્ધાઓમાં અમે પ્રબળ દાવેદાર તરીકે શરૂઆત કરીશું. ગત સત્રમાં વિશ્વ કપમાં અમે સૌથી વધુ મેડલ જીત્યા હતા, જે અમારી પ્રબળ દાવેદારી દર્શાવે છે.
આ સાથે જ અભિનવે કોરોના અંગે ચિંતા વ્યક્ત કરી અને જણાવ્યું કે, સમગ્ર દુનિયામાં ફેલાઈ રહેલા કોરોના વાયરસના વધતા કેસમાંથી ઉદ્ભવેલી સ્થિતિ પર સાવધાની પૂર્વક ધ્યાન રાખવું જોઈએ.
આંતરરાષ્ટ્રીય ઑલિમ્પિક સમિતિ(IOC)એ મંગળવારે કહ્યું હતું કે, કોરોના વાયરસના ભય પછી પણ ટોક્યો ઑલિમ્પિકની તૈયારી ઝડપી થઇ રહી છે. ઉલ્લેખનીય છે કે, ટોક્યો ઑલિમ્પિક 24 જુલાઈથી શરૂ થઇ રહ્યું છે.
