સિંધુએ આ વર્ષે સ્વિટ્ઝરલેન્ડના બાસેલમાં થયેલી વર્લ્ડ બેડમિંટન ચેમ્પિયનશીપમાં ગોલ્ડ મેડલ જીતીને ઈતિહાસ રચ્યો હતો. જો કે તેઓને ચીન ઓપનના બીજા રાઉન્ડમાં હારીનો સામનો કરવો પડ્યો હતો. પરંતુ સિંધુ હવે આ હારને ભુલાવીને બેડમિંટન ટૂર્નામેન્ટમાં નવી શરુઆત કરવાના ઈરાદે ઉતરશે.
ટૂર્નામેન્ટના પ્રથમ તબક્કે સિંધુની ટક્કર અમેરિકાની બીવન ઝાંગ સાથે થશે. સિંધુએ છેલ્લી આઠ કારકિર્દી મેચમાં વર્લ્ડ નંબર -11 ઝાંગને પાંચ વખત પરાજય આપ્યો છે. તેણે વર્લ્ડ ચેમ્પિયનશીપમાં પણ ઝાંગને પરાજય આપ્યો હતો. 26 વર્ષની સિંધુ 2017 માં કોરિયા ઓપનનું ટાઈટલ પોતાને નામ કરી ચૂકી છે, ત્યારે હવે તેની નજર બીજી વખત આ ખિતાબને પોતાના નામે કરવા પર રહેશે.
સિંધુ ઉપરાંત આઠમી સીડ સાઇના તેના અભિયાનની શરૂઆત કોરિયાના કિમ ગા ઈયૂન સામેની મેચથી કરશે. સાયનાએ ઈયૂન સામે કારકિર્દીનો 2-0 રેકોર્ડ બનાવ્યો છે.
તો બીજી તરફ મેન્સ સિંગલ્સમાં ચીન ઓપનના ક્વાટર ફાઈનલમાં પહોચનાર બી. સાઈ પ્રણીત પોતાની પ્રથમ મેચ પાંચમી સીડ ડેનમાર્કના એંડર્સ એન્ટનસેન સામે કોર્ટમાં ઉતરશે. તો તે જ સમયે પારુપલ્લી કશ્યપ પોતાના પ્રથમ રાઉન્ડમાં ક્વોલિફાયરનો સામનો કરશે.
મેન્સ ડબલ્સમાં સાત્વિકસાઈરાજ રેંકીરેડ્ડી અને ચિરાગ શેટ્ટીની જોડીને પ્રથમ રાઉન્ડમાં જાપાનના તાકેશી કમુરા અને કિગો સોનોડાની જોડીનો સામનો કરવાનો રહેશે.
