મેડ્રિડઃ કોરોનાના કારણે સ્પેનમાં હાલ સુધી 738 મોત થઇ ગયા છે. જેના કારણે સ્પેનમાં કોરોના વાઇરસમાં મરનારની સંખ્યામાં વધારો થયો છે અને આ આંકડો 3434 સુધી પહોંચી ગયો છે. ચીનથી શરૂ થયેલા કોરોના વાઇરસે યૂરોપને પોતાનો ગઢ બનાવી લીધો છે. ચીનમાં 3281 લોકોના મોત કોરોના વાઇરસના ઝપેટમાં આવવાને કારણે થયા હતા. ઇટાલીમાં તો તેનાથી પણ ખરાબ સ્થિતિ છે. અહીં 6820 લોકોના મોત થયા છે.
મંગળવારની તુલનામાં 27% ટકાના વધારા સાથે સ્પેનમાં 738 લોકોના મોત થયા છે. દેશમાં કુલ 47,610 લોકો કોરોનાની ઝપેટમાં છે. સ્વાસ્થ્ય અધિકારી ફર્નાન્ડો સાઇમને જણાવ્યું કે, આવનારા સમયમાં આ આંકડો વધવાની શક્યતા છે. સ્પેનમાં 14 માર્ચથી લાગૂ લૉકડાઉન છતાં અહીં મોત અને ઇન્ફેક્શનના કેસ સતત વધી રહ્યાં છે.
સ્પેનમાં સ્થિતિ એટલી ખરાબ છે, તેનો ખ્યાલ એ વાત પરથી આવે છે કે સ્પેનની સેનાને તે વાતની જવાબદારી આપવામાં આવી છે કે તે ઘરોમાં લાવારિશ પડેલા મૃતદેહોની માહિતી મેળવે. જાણવા મળી રહ્યું છે કે કેટલાક ઘરોમાં ઘણા દિવસથી મૃતદેહો પડેલા છે, પરંતુ કોરોનાના સંક્રમણના ડરથી ઘરમાં રહેલા પરિવારના સભ્યો તેને ઉપાડવાની હિંમત કરી શકતા નથી.
ઇટાલીમાં અત્યાર સુધી 69,176 લોકો કોરોના વાઇરસની ઝપેટમાં આવી ચુક્યા છે. તેનાથી 6820 લોકોના મોત થયા છે. જ્યારે ચીનમાં 81,218 લોકો કોરોના પોઝિટિવ મળ્યા હતા અને 3281 લોકોના મોત થયા છે. બીજી તરફ અમેરિકામાં પણ સ્થિતિ ખરાબ છે. અહીં 54,428 લોકો કોરોનાથી ઇફેક્ટોડ છે અને 773 લોકોના મોત થયા છે.
