વડોદરામાં ચર્ચિત નકલી નોટ કેસમાં વધુ 5 આરોપીની ધરપકડ

વડોદરા: શહેરમાં SOG પોલીસે બાતમીના આધારે બે દિવસ અગાઉ વારસીયા વિસ્તારમાંથી નકલી ચલણી નોટો સાથે બે આરોપીની ધરપકડ કરી હતી. જેના સમગ્ર મામલે SOG પોલીસે તપાસ કરતાં નોટો છાપનાર સુધીનું પગેરૂં મળી આવ્યું હતું. પોલીસે સુરતના વરાછા વિસ્તારમાં રહેતા અને હીરા ઉદ્યોગ સાથે સંકળાયેલા પાંચ આરોપીની ધરપકડ કરી હતી. તેમજ આરોપી પાસેથી રૂપિયા 100ના દરની 91 અને 500ના દરની 13 નકલી નોટ તેમજ પ્રિન્ટર અને લેપટોપ સહિત રૂપિયા 23 હજારનો મુદ્દામાલ જપ્ત કર્યો હતો.

વડોદરા SOG પોલીસે બાતમીના આધારે 2 દિવસ અગાઉ વારસીયા વિસ્તારમાંથી નકલી નોટ સાથે અભિષેક અને સુમિત નામના આરોપીની ધરપકડ કરી હતી. પોલીસ તપાસમાં આરોપીઓએ કુલદિપ નામના વ્યક્તિ પાસેથી નોટોની અડધા ભાવે ખરીદી કરી હોવાની કબૂલાત કરી હતી. ત્યારબાદ પોલીસે આરોપી કુલદિપને મોબાઇલ લોકેશનના આધારે સુરતના વરછાં વિસ્તારમાંથી ઝડપી પાડ્યો હતો.

મળતી માહિતી મુજબ, આરોપી હીરા ઉદ્યોગમાં હીરા ધસવાનું કાર્ય કરતા હતા. જેમાં મંદી આવતા આરોપીઓ યુ-ટ્યુબના માધ્યમથી નકલી નોટ પ્રિન્ટ કરવાનું શીખ્યાં હતા. આમ, ઈ-સેવાનો દૂરપયોગ કરીને આરોપીઓ નકલી નોટ છાપી વિવિધ શહેરમાં અડધી કિંમતે વેચતાં હતા. ઘટનાની જાણ વડોદરા SOG થતાં 48 કલાકમાં જ આરોપીઓની ધરપકડ કરવામાં આવી હતી.

ઉલ્લેખનીય છે કે, પોલીસ દ્વારા બે દિવસ અગાઉ નકલી નોટનો વેપલો કરનાર સાત આરોપીની ધરપકડ કરવામાં આવી હતી. જેમાં સુરતથી ઝડપાયેલા પાંચ આરોપી પાસેથી પોલીસે નોટ પ્રિન્ટ કરવા માટેનું પ્રિન્ટર અને 500 તથા 100ના દરની નકલી નોટો ઝબ્બે કરી હતી.

આમ, વડોદરા SOG પોલીસે નકલી નોટોનું છાપકામ કરનાર અને નોટને બજારમાં ધુસેડનાર સહિત કુલ સાત આરોપીની ધરપકડ કરી ઘટનાનો ભેદ ઉકેલ્યો હતો. જેમાં બેરોજગારનો ભોગ બનેલા આરોપીઓએ શોર્ટકટથી રૂપિયા કમાવવા માટે નકલી નોટો પ્રિન્ટ કરવાનો ગોરખ ધંધો શરૂ કર્યો હોવાનું કબૂલ્યું હતું.