કોરોના સંક્રમણને લઈ વડોદરામાં રાત્રિના 9 કલાકથી સવારના 6 કલાક સુધી કરફ્યૂ લાગૂ

રાજ્યમાં કોરોનાના કેસમાં સતત વધારો થઈ રહ્યો છે. વડોદરા શહેરમાં પણ કોરોનાના કેસમાં વધારો થઈ રહ્યો છે, તેને લઈને આજે શુક્રવારે OSD વિનોદ રાવે જિલ્લા કલેક્ટર અને પોલીસ કમિશ્નર સહિત આરોગ્ય વિભાગના અધિકારીઓ સાથે સમીક્ષા બેઠક યોજી હતી. જેમાં વડોદરા શહેરમાં આવતીકાલે શનિવારથી રાત્રિના 9 થી સવારના 6 સુધી કરફ્યૂ લગાવવામાં આવ્યો છે. આ ઉપરાત શનિ અને રવિવારના રોજ મોલ અને મલ્ટીપ્લેક્સ બંધ રાખવાનો પણ નિર્ણય કરવામાં આવ્યો છે.

• વડોદરામાં કોરોનાના કેસમાં સતત વધારો
• કોરોના સંક્રમણને લઈ વડોદરામાં રાત્રિના 9થી સવારના 6 સુધી નાઈટ કરફ્યૂ
• શનિવાર અને રવિવારે મોલ અને થીએટર બંધ રાખવાનો કરાયો નિર્ણય

વડોદરાઃ રાજ્યમાં કોરોનાના કેસમાં સતત વધારો થઈ રહ્યો છે. અમદાવાદ, સુરત બાદ હવે વડોદરા શહેરમાં પણ કોરોનાના કેસમાં વધારો થઈ રહ્યો છે. સ્થાનિક સ્વરાજની ચૂંટણી બાદ કોરોનાના કેસમાં ઉત્તરોઉત્તર વધારો થઈ રહ્યો છે, તેને લઈને તંત્ર પણ દોડતું થયું છે. ત્યારે OSD વિનોદ રાવે જિલ્લા કલેક્ટર અને પોલીસ કમિશ્નર સહિત આરોગ્ય વિભાગના અધિકારીઓ સાથે સમીક્ષા બેઠક યોજી હતી.

નાગરિકોને બીનજરૂરી બહાર ન નિકળવા અપીલ

આ બેઠકમાં નિર્ણય લેવામાં આવ્યો છે કે, અમદાવાદની જેમ વડોદરા શહેરમાં પણ નાઈટ કરફ્યૂના સમયમાં ફેરફાર કરવામાં આવશે. વડોદરામાં આવતીકાલે શનિવારથી રાત્રિના 9 થી સવારના 6 વાગ્યા સુધી રાત્રિ કરફ્યૂ લગાવવાનો નિર્ણય કરાયો છે. આ ઉપરાત શનિ અને રવિવારે મોલ અને થીએટર પણ બંધ રાખવાનો નિર્ણય કરવામાં આવ્યો છે. વડોદરા શહેરમાં જે પ્રમાણે કોરોનાના કેસ વધી રહ્યા છે, ત્યારે નાગરિકોને પણ બીન જરૂરી બહાર ન નિકળવા અપીલ કરવામાં આવી છે. જોકે, દિવસ દરમિયાન બસો દોડાવવામાં આવશે. બસની અંદર સોશિયલ ડિસ્ટન્સનું પાલન કરવામાં આવશે.

આ પણ વાંચોઃ સુરતમાં આવતીકાલે શનિવારથી રાત્રે 9થી સવારે 6 સુધી કરફ્યૂ

ગતરોજ બાગ-બગીચાઓ બંધ રાખવાનો આદેશ આપવામાં આવ્યો

વડોદરા શહેરમાં કોરોના સંક્રમણને લઈને તંત્ર દ્વારા ગતરોજ વડોદરા શહેરમાં આવેલા બાગ-બગીચાઓ બંધ રાખવાનો આદેશ આપવામાં આવ્યો હતો. ત્યારબાદ ટ્યુશન ક્લાસીસ અને કોચિંગ ક્લાસીસ પણ બંધ રાખવાના આદેશ આપ્યા હતા. આજે શુક્રવારે કોર્પોરેશન અને પોલીસના સંયુક્ત ઓપરેશનમાં મંગળ બજાર ખાતે ભીડ ભાડ વાળા વિસ્તારમાં લારી અને પથારાવાળાને હટાવવામાં આવ્યાં હતા.