વડોદરામાં CM રૂપાણીએ ગજવી 3 સભા, કહ્યું- રાજ્યમાં આવશે લવ જેહાદનો કાયદો

ગુજરાતમાં યોજાનારી સ્થાનિક સ્વરાજની ચૂંટણીઓને આડે ગણતરીના દિવસો રહ્યા છે, ત્યારે રાજકીય પક્ષોએ ઉમેદવારોના પ્રચારની કામગીરી તેજ કરી છે. મુખ્યપ્રધાન સહિત પ્રદેશ પ્રમુખ પણ ગુજરાતના વિવિધ સ્થળો પર જાહેર સભાઓ ગજવી રહ્યા છે. મુખ્યપ્રધાન વિજય રૂપાણી આજે રવિવારે વડોદરાનાં પ્રવાસે છે અને 3 સ્થળો પર જાહેરસભા સંબોધી હતી. આ જાહેર સભા દરમિયાન અચાનક તેમની તબિયત લથડી હતી. જેથી તેમને સ્ટેજ પર જ પ્રાથમિક સારવાર આપવામાં આવી હતી.

• ચૂંટણીને લઈ CMની વડોદરામાં 3 જાહેર સભા
• લવ જેહાદ અંગે CMએ આપ્યું નિવેદન
• સભા દરમિયાન મુખ્યપ્રધાનની તબિયત લથડી

વડોદરાઃ આજે રવિવારે મુખ્યપ્રધાન વિજય રૂપાણીએ વડોદરા મહાનગરપાલિકાના BJPના ઉમેદવારોના પ્રચારા અર્થે જાહેર સભાને સંબોધી હતી. તરસાલી વિસ્તારમાં થયેલી જાહેરસભામાં વોર્ડનં 16, 17, 18 અને 19 વોર્ડનાં ઉમેદવારો માટે પ્રચાર કર્યો હતો. આ સમયે મંચ પર શહેર પ્રમુખ ઉપરાંત પ્રધાનો સહિતના હોદ્દેદારો અને BJPના ચારેય વોર્ડના ઉમેદવારો ઉપસ્થિત રહ્યા હતા. આ સભા શરૂ થયા પહેલાં શહેર પ્રમુખે પુલવામામાં શહિદ થયેલા જવાનો માટે 2 મિનિટનું મૌન પાળ્યું હતું.

ગુજરાતમાં સુવર્ણ કાળ આવી રહ્યો છે

મુખ્યપ્રધાને પોતાના પ્રવચનમાં ગુજરાત માટે આ કાળ સુવર્ણકાળ ગણાવ્યો છે. તેમણે જણાવ્યું કે, કેન્દ્રમાં BJPની સરકાર અને રાજ્યમાં પણ BJPની સરકાર હોવાથી ગુજરાતને સરકારી યોજનાનાં વધુ લાભો મળી રહ્યા છે. 5 વર્ષમાં 7,500 કરોડ ગુજરાતને આપ્યા છે. પંચાયતથી પાર્લામેન્ટ સુધી BJPનું શાસન છે. આ સાથે જ મુખ્યપ્રધાને કોંગ્રેસ પર પ્રહાર કરતાં જણાવ્યું હતું કે, કોંગ્રેસે સત્તા માટે દુરબીનની મદદ લેવી પડશે. મહારાષ્ટ્રમાં શિવસેના સાથે ઇલું ઇલું કરીને સત્તા મેળવી છે.

કોંગ્રેસમાં 3 ટર્મ હારેલાને પણ ટિકિટ

મુખ્યપ્રધાન રૂપાણીએ કોંગ્રેસને આડે હાથ લેતા જણાવ્યું કે, કોંગ્રેસ 3 ટર્મ હારેલાને પણ ટિકિટ આપે છે, જ્યારે BJPએ ત્રણ ટર્મ જીતેલા અને 60 વર્ષથી વધુ ઉંમરનાને ટિકિટ આપી નથી.

લવ જેહાદ અંગેનો કાયદો લાવશે

CM રૂપાણીએ શહેરના વિકાસ અંગે જણાવ્યું કે, વડોદરામાં 250 કરોડનો સૌથી લાંબો ઓવર બ્રિજ બની રહ્યો છે. ગુજરાતના મોટા શહેરોમાં મેટ્રો ટ્રેન શરૂ કરાશે. ગુજરાત સરકાર ભૂમાફિયા વિરુદ્ધ લેન્ડ ગ્રેબિંગ એક્ટ તેમજ અસામાજિત તત્વોને રોકવા ગુજસીટોક કાયદો લાવી છે. આગામી સમયમાં લવ જેહાદ અંગેનો કાયદો લાવશે.

નિઝામપુરાની સભા દરમિયાન મુખ્યપ્રધાનની તબિયત લથડી

મુખ્યપ્રધાન વિજય રૂપાણી વડોદરા શહેરમાં 3 સભા સંબોધવાના હતા. જેમાં CM રૂપાણી તરસાલી બાદ સંગમ ચાર રસ્તા ખાતે સભા યોજીને નિઝામપુરા ખાતે સભાને સંબોધન કરતા હતા. આ દરમિયાન તેમની તબિયત નાદુરસ્ત રહેતા તેઓ અડધી સભા છોડીને નીકળી ગયા હતા.

PM મોદીએ મુખ્યપ્રધાન સાથે કરી ચર્ચા

આજે રવિવારે વડોદરામાં જાહેર સભાને સંબોધન કરવા સમયે મુખ્યપ્રધાન રૂપાણી સ્ટેજ પર ઢળી પડ્યા હતા. જેથી તેમને સારવાર અર્થે હોસ્પિટલ ખસેડવામાં આવ્યા હતા. ત્યારબાદ વડાપ્રધાન મોદીએ CM રૂપાણી સાથે ટેલિફોનીક વાતચીત કરીને ખબર અંતર પૂછ્યા હતા. જેમાં PM મોદીએ મુખ્યપ્રધાનને સંપૂર્ણ સ્વાસ્થ્ય ચકાસણી કરાવીને વધુ કાળજી લેવા સાથે યોગ્ય આરામ લેવાની સલાહ આપી છે.

CM રૂપાણીને અમદાવાદની યુ,એન.મહેતા હોસ્પિટલમાં ચેકઅપ માટે લવાયા

મુખ્યપ્રધાન રૂપાણીમને અમદાવાદની યુ.એન.મહેતા હોસ્પિટલમાં સારવાર અર્થે લાવવામાં આવ્યા છે. જ્યાં તેમની તબીબી સારવાર કરવામાં આવશે. ઉલ્લેખનીય છે કે, મુખ્યપ્રધાન રૂપાણી એરપોર્ટથી નિકળ્યા ત્યારે હાથ બતાવીને અભિવાદન કર્યું હતું.

સી.આર.પાટીલ યુ.એન.મહેતા હોસ્પિટલમાં હાજર

મુખ્યપ્રધાનને યુ.એન.મહેતા હોસ્પિટલમાં લાવવામાં આવતાં ભાજપ પ્રદેશ અધ્યક્ષ સી.આર.પાટીલ હોસ્પિટલમાં હાજર છે, જ્યારે રાજ્ય ગૃહ પ્રધાન પ્રદિપસિંહ જાડેજા હોસ્પિટલ જવા રવાના થયા છે. આ સાથે જ રાજ્યના DGP આશિષ ભાટિયા પણ હોસ્પિટલ પહોંચ્યા છે.