સુરતમાં બેરજોગારી મુદ્દે યુથ કોંગ્રેસ મેદાને, રેલી યોજતા કાર્યકર્તાઓની પોલીસે કરી અટકાયત

સમગ્ર ગુજરાત રાજ્ય તથા સુરત શહેર અને જિલ્લામાં વધતી જતી બેરોજગારીના પ્રશ્ને આજે સુરત સિટી યુથ કોંગ્રેસ દ્વારા રેલીનું આયોજન કરવામાં આવ્યું હતું, પરંતુ આ રેલી નીકળે તે પહેલા સુરત પોલીસે આશરે 15થી વધુ યુથ કોંગ્રેસના કાર્યકર્તાઓની અટકાયત કરી હતી.

• સુરતમાં બેરોજગારી મુદ્દે યુથ કોંગ્રેસ મેદાને
• પોલીસે રેલી કાઢતા કાર્યકર્તાઓની કરી અટકાયત
• ઝંડા અને બેનરો સાથે કાર્યકર્તાઓ ભેગા થયા

સુરતઃ સ્થાનિક સ્વરાજની ચૂંટણી નજીક છે અને તેની અસર હવે સુરત શહેરમાં જોવા મળી રહી છે. રોજગારીનો મુદ્દો કોંગ્રેસ દ્વારા ઊઠાવવામાં આવી રહ્યું છે. રાજ્યભરમાં આ મુદ્દે અનેક કાર્યક્રમ યોજવામાં આવ્યા હતા. ખાસ કરીને સુરતની વાત કરવામાં આવે તો યુથ કોંગ્રેસ દ્વારા આજે એમટીબી કોલેજથી લઈ કલેકટર કચેરી સુધી બેરોજગારીના મુદ્દે રેલી યોજવામાં આવી હતી. ઝંડા અને બેનરો સાથે મોટી સંખ્યામાં યુથ કોંગ્રેસના કાર્યકર્તાઓ ભેગા થયા હતા, પરંતુ રેલી નીકળે તે પહેલા મોટી સંખ્યામાં પોલીસ કાફલો પણ ત્યાં પહોંચી ગયો હતો.

આશરે 15થી વધુ કાર્યકર્તાઓની અટકાયત

યુથ કોંગ્રેસના કાર્યકર્તાઓને ઊંચકી પોલીસ વેનમાં મૂકવા લાગી હતી. તે સમયે કાર્યકર્તાઓ દ્વારા વિરોધ નોંધાવવામાં આવ્યો હતો અને સૂત્રોચ્ચાર કર્યો હતો. આશરે 15થી વધુ કાર્યકર્તાઓની અટકાયત સુરત ઉમરા પોલીસ દ્વારા કરવામાં આવી હતી. તે દરમિયાન કોંગ્રેસ કાર્યકર્તાઓ અને પોલીસ વચ્ચે ઘર્ષણ પણ જોવા મળ્યું હતું.