અમદાવાદના સરદાર વલ્લભભાઈ પટેલ સ્ટેડિયમને નવું નામ અપાતા સુરતમાં પાસ સમિતિએ કર્યો વિરોધ

અમદાવાદના સરદાર વલ્લભભાઈ પટેલ સ્ટેડિયમનું નામ બદલી નરેન્દ્ર મોદી સ્ટેડિયમ રાખવામાં આવતા સુરત પાસ સમિતિ દ્વારા સૂત્રોચ્ચાર સાથે વિરોધ પ્રદર્શન કરવામાં આવ્યું હતું. સોમવારે કલેકટર કચેરી ખાતે સભ્યોએ ભેગા થઈ સૂત્રોચ્ચાર કરી સ્ટેડિયમનું નામ ફરી સરદાર વલ્લભભાઈ પટેલ રાખવા માગ કરવામાં આવી હતી.

• જિલ્લા કલેક્ટરને આવેદનપત્ર આપી સુત્રોચ્ચાર કર્યા
• સ્ટેડિયમનું નામ ફરી સરદાર વલ્લભભાઈ પટેલ રાખવાની માગ
• નામ ન બદલાય તો આંદોલન કરશે

સુરત: અમદાવાદના મોટેરા ખાતે વિશ્વનું સૌથી મોટું સ્ટેડિયમ બનાવવામાં આવ્યું છે. આ સ્ટેડિયમનું નામ સરદાર વલ્લભભાઈ પટેલ બદલી નરેન્દ્ર મોદી સ્ટેડિયમ રાખવામાં આવતા સુરત પાસ સમિતિ દ્વારા વિરોધ નોંધાવવામાં આવ્યો છે. પાસ સમિતિ દ્વારા જિલ્લા કલેકટરને આવેદનપત્ર આપી નરેન્દ્ર મોદીનું નામ હટાવી ફરી સરદાર વલ્લભભાઈ પટેલ સ્ટેડિયમ નામ રાખવા માગ કરવામાં આવી છે. જો માંગણી સ્વીકારવામાં ન આવે તો આવનારા દિવસોમાં સમગ્ર રાજ્યમાં ગાંધી ચિંધ્યા માર્ગે આંદોલન કરવાની પાસ સમિતિએ ચીમકી ઉચ્ચારી છે.

સમગ્ર રાજ્યમાં આંદોલન કરવામાં આવશે : પાસ

પાસ સમિતિના કન્વીનર ધાર્મિક માલવયાએ જણાવ્યું હતું કે, અમદાવાદ મોટેરા સ્ટેડિયમનું નામ જે રીતે નરેન્દ્ર મોદી સ્ટેડિયમ કરવામાં આવ્યું છે, સરદાર વલ્લભભાઇ પટેલનું નામ હટાવી આ નામ રાખવામાં આવ્યું છે તેનો અમે વિરોધ કરીએ છીએ.