સુરતઃ કાલુપુર કો. ઓપરેટીવ બેંક લિમિટેડ બેંકનો મેંંનજર જયેશ સાકળીયાએ સીઆઈડી ક્રાઈમમાં બેન્ક સાથે થયેલી 6 કરોડની છેતરપીંડી અને અને વિશ્વાસઘાતની ફરિયાદ નોંધાવી હતી. જેમાં બેન્કમાથી તત્કાલીન બેન્ક મેનેજર સાથે મેળાપણું કરી કાવતરૂ રચી રૂપિયા 6 કરોડનું હાઈપોથીકેશન સ્ટોક કમ બુક ડેષ્ટ પ્રકારનું બેંકની ગાઈડ લાઈન અને સરક્યુલરો તેમજ નિયમોનું ઉલ્લંઘન કરી ધિરાણ મેળવી લીધું હતું. ધિરાણની રકમ લીધા બાદ બેન્કમાં પરત ભરપાઈ કરી ન હતી. આ રીતે ધિરાણની શરતોનું પાલન કર્યું નહોતું.
આ સાથે જ બેન્ક એકાઉન્ટને એન.પી.એ. કરાવી, મોર્ગેજમાં મુકેલી પ્રોપર્ટીનું ઓવર વેલ્યુએશન કરાવ્યું હતું. કોર્ટ કમિશ્નર સમક્ષ જપ્તીની કાર્યવાહી દરમિયાન ખોટા અને બનાવટી સ્ટોક સ્ટેટમેન્ટ તથા ઉઘરાણીના સ્ટેટમેન્ટ રજૂ કરી બેંક સાથે ગુનાહિત વિશ્વાસઘાત અને છેતરપિંડી કરી ગુનો કર્યો હતો.
સીઆઈડી ક્રાઈમે સમગ્ર મામલે મેસર્સ કષ્ટભંજન ટેક્ષટાઈલ પ્રા.લી.ના ડિરેકટર ભગવાન નારાયણ પટેલ, અશ્વિન નારાયણ પટેલ, જામીનદાર ભાવેશ પટેલ સહિત મુંબઈ રહેતા હેમાંગ પરીખ અને ઓવર વેલ્યુએશન કરનાર વેલ્યુઅર એચ.ટી.શાહ વિરુદ્ધ ગુનો દાખલ કરી તપાસ શરૂ કરી હતી.
તપાસમાં આરોપીઓ સામે યોગ્ય પુરાવા મળી આવતા આરોપી ભગવાનભાઈ નારાયણભાઈ પટેલ, અશ્વિનભાઈ નારાયણભાઈ પટેલ અને ભાવેશભાઈ ભગવાન પટેલની ધરપકડ કરી હતી. સાથે કોર્ટમાં રજૂ કરી રીમાન્ડની માંગણી કરી છે. આ આરોપીઓ વિરુદ્ધ સીઆઇડી ક્રાઇમે IPC કલમ 406, 409, 420, 465, 467, 468, 471, 120(B) મુજબ ગુનો નોંધી તપાસ શરૂ કરી છે.
