બારડોલીના સીટી સ્કેન સેન્ટરમાં આવતા 80 ટકા દર્દીઓ કોરોના સંક્રમિત

બારડોલીમાં કોરોનાના કહેર વચ્ચે સીટી સ્કેન સેન્ટર પર દર્દીઓની લાંબી લાઇન લાગી રહી છે. 3થી 4 કલાકની રાહ જોયા બાદ પણ સમયપર સીટી સ્કેન થઈ શકતું નથી. શહેરમાં આવેલા 4 સીટી સ્કેન સેન્ટર પર વહેલી સવારથી જ દર્દીઓની લાંબી કતાર જોવા મળે છે. પ્રત્યેક સેન્ટર પર રોજના 150થી 200 સીટી સ્કેન કરવામાં આવી રહ્યા છે. જે પૈકી 80 ટકા દર્દીઓ કોરોના પોઝિટિવ જોવા મળી રહ્યા છે.

• 3થી 4 કલાક રાહ જોયા બાદ આવે છે નંબર
• પ્રત્યેક સેન્ટર પર રોજના 150થી 200 દર્દીઓ આવે છે
• કોરોના સંક્રમણને લઈને HRCT રિપોર્ટ માટે લાંબી લાઇન

સુરત: જિલ્લામાં બારડોલી સહિત કોરોનાનું સંક્રમણ વધી રહ્યું છે. ત્યારે કેટલાક લોકો રેપીડ એન્ટિજન કે RT-PCR ટેસ્ટની જગ્યાએ કોરોનાનું સંક્રમણ જાણવા માટે સીટી સ્કેનનો સહારો લઈ રહ્યા છે. જોકે સીટી સ્કેન સેન્ટર પર લોકોની લાંબી લાઈન લાગતા ત્યાં પણ વેઇટિંગ જોવા મળી રહ્યું છે. બારડોલીના 4 સીટી સ્કેન સેન્ટરો પર સવારથી જ લાંબી કતાર જોવા મળી રહી છે. દરેક સીટી સ્કેન સેન્ટર પર રોજના 150થી 200 લોકો સીટી સ્કેન કરાવવા આવી રહ્યા છે. જેમાંથી 80 ટકા દર્દીઓ કોરોના પોઝિટિવ આવતા હોવાનું જાણવા મળે છે.

આ પણ વાંચો: કોવિડ-19ના સંક્રમણને રોકવા માટે રાજ્યમાં કાર્યરત સીટી સ્કેન સેન્ટરની કામગીરીની ચકાસણી કરાશે :ડૉ.એચ.જી.કોશિયા

બારડોલીના સીટી સ્કેન સેન્ટર હાઉસફુલ

સંક્રમણ વધતા લોકોની કોરોનાના ટેસ્ટિંગ સેન્ટર પર પણ લાંબી લાઇન જોવા મળે છે. કેટલાક સેન્ટરો પર ટેસ્ટ માટે લોકો મોટી સંખ્યામાં પહોંચી જતા અનેક જગ્યાએ ટેસ્ટિંગ કીટ પણ ખૂટી પડી છે. જેને કારણે તાત્કાલિક પરિણામ મેળવવા માટે લોકો સીટી સ્કેનનો સહારો લઈ રહ્યા છે. બીજી તરફ રેપીડ અને RT-PCRમાં પોઝિટિવ આવેલા દર્દીઓમાં પણ કોરોના સંક્રમણ કેટલું છે તે જાણવા માટે તબીબો દર્દીઓને સીટી સ્કેન કરવા માટેની સલાહ આપી રહ્યા છે. જેને કારણે હવે બારડોલીના સીટી સ્કેન સેન્ટર પણ હાઉસફુલ થઈ રહ્યા છે.

આ પણ વાંચો: વડોદરામાં શહેર પ્રમુખની દરમિયાનગીરી બાદ સીટી સ્કેનના ભાવ ઘટાડાયા

સીટી સ્કેન સેન્ટરો પર લાંબી ભીડ

બારડોલીની સરદાર સ્મારક હોસ્પિટલ ઉપરાંત અન્ય ખાનગી સેન્ટરો પર પણ સીટી સ્કેન માટે ભારે ભીડ છે. સ્થિતિ એવી છે કે શહેરના મોટાભાગના સીટી સ્કેન સેન્ટરમાં દર્દીઓને તપાસ કરાવવા માટે 3થી 4 કલાકનું વેઈટિંગ કરવો પડી રહ્યો છે. આ પહેલા બારડોલીમાં ટેસ્ટિંગ કરવા અને હોસ્પિટલમાં દાખલ થવા માટે લાઈન લાગી હતી. હવે કોરોનાનું સંક્રમણ કેટલું છે તે જાણવા માટે સીટી સ્કેન સેન્ટર પર પણ લાંબી લાઈનો જોવા મળી રહી છે.

સરદાર સ્મારક હોસ્પિટલમાં રાહતદરે સીટી સ્કેન

બીજી તરફ બારડોલીના તમામ સેન્ટરો કોરોના માટે જરૂરી HRCT ટેસ્ટ માટે રૂપિયા 3,000 વસૂલી રહ્યા છે તો બીજી તરફ સરદાર સ્મારક હોસ્પિટલમાં રાહત દરે માત્ર 2,300 રૂપિયામાં આ ટેસ્ટ થઈ રહ્યો છે.

રોજ 150 જેટલા દર્દીઓ આવે છે, તેમાંથી 120થી 130 પોઝિટિવ

બારડોલીમાં આવેલા ખાનગી સીટી સ્કેન સેન્ટરના રેડિયોલોજિસ્ટ ડૉ. બ્રિજેશ ચૌહાણે જણાવ્યુ હતું કે, અમારા સેન્ટરમાં રોજના 150 જેટલા દર્દીઓ સીટી સ્કેન માટે આવે છે. તેમાંથી 120થી 130 જેટલા દર્દીઓ કોરોના પોઝિટિવ જ હોય છે.