ભાદર-1 ડેમમાં ઓગસ્ટ મહિનાના અંત સુધી ચાલશે પાણીનો જથ્થો

જેતપુર અને રાજકોટને પાણી પૂરું પાડતા ભાદર-1 ડેમમાં માત્ર ઓગસ્ટ મહિનાના અંત સુધી ચાલી શકે કેટલા પાણીનો જથ્થો ઉપલબ્ધ છે. ભાદર-1 ડેમનું નિર્માણનું કાર્ય 1952માં શરૂ થયું હતું અને 1960માં આ ડેમ નિર્માણ પામ્યો હતો. ત્યારથી આ ડેમ સૌરાષ્ટ્રની જીવાદોરી સાબિત થયો છે.

• ભાદર-1 ડેમ સિંચાઈ અને પીવાના પાણીનો સ્ત્રોત
• ડેમની પાણી સંગ્રહ કરવાની ક્ષમતા 6648 MCFT
• હાલ 1429 MCFT પાણીનો જથ્થો ઉપલબ્ધ

રાજકોટઃ હાલ વરસાદ ખેંચાયો છે છતાં સૌરાષ્ટ્રના સૌથી મોટા ભાદર-1 ડેમમાં ઓગસ્ટ મહિનાના અંત સુધી ચાલે તેટલું પાણી અકબંધ છે. સામાન્ય રીતે મોસમના વરસાદની શરૂઆત 15 જુનથી ગણાય છે. આ વર્ષે વહેલા ચોમાસાની આગાહીઓ વચ્ચે પણ વરસાદ ખેંચાયો છે. તેવા સંજોગોમાં જેતપુરની જીવાદોરી સમાન અને રાજકોટનો પાણીનો સ્ત્રોત એવા ભાદર-1 ડેમમાં હાલ ઓગસ્ટ મહિનાના અંત સુધી ચાલે તેટલો પાણીનો જથ્થો ઉપલબ્ધ છે.

ડેમમાં પાણીનો જથ્થો સંગ્રહ કરવાની ક્ષમતા 6648 MCFT

ભાદર-1 ડેમની ઊંડાઈનું લેવલ 34 ફૂટ છે. ભાદર ડેમમાં પાણીનો જથ્થો સંગ્રહ કરવાની ક્ષમતા 6648 MCFT છે, ત્યારે હાલ 1429 MCFT પાણીનો જથ્થો ઉપલબ્ધ છે. ગત વર્ષે ડેમમાંથી ખેતીને સિંચાઈ માટે દસ પાણ આપવામાં આવેલા હતા. જેમાં 6 પાણ રવિ પાક માટે, 2 પાણ ઉનાળુ પાક માટે અને 2 પાણ કોરવાણ માટે આપવામાં આવેલ હતા.

આ પણ વાંચોઃ કચ્છના ખેડૂતો માટે આનંદો...જિલ્લાને મળશે નર્મદાનું વધારાનું 1 મિલિયન એકર ફીટ પાણી

રાજકોટ સહિતના અનેક ગામડા ઉપર જળસંકટ

દરરોજ રાજકોટ મ્યુનિસિપલ કોર્પોરેશન 10 MGD એટલે કે મિલિયન ગેલન પર ડે, રાજકોટ રૂડા 1 MGD અને જેતપુર શહેર 3.40 MGD. આ ઉપરાંત ખોડલધામ જૂથ યોજના અને અમરનગર જૂથ યોજના અંતર્ગત 0.93 MGD પાણી ભાદર-1 ડેમમાંથી દરરોજ ઉપાડે છે. ભાદર ડેમનું હાલના પાણીનું લેવલ જોતા ભાદર-1 ડેમ પર આધારિત વિસ્તારોને ઓગસ્ટ મહિનાના અંત સુધી પાણીની સમસ્યાનો સામનો કરવો પડશે નહીં. પરંતુ જો હજુ વરસાદ ખેંચાશે તો જળસંકટ ઘેરાવાની શક્યતાઓ પણ રહેલી છે.