12-જામનગર બેઠક પર ઉમેદવારીનો રાફડો ફાટયા બાદ ઉમેદવારી પત્રોની ચકાસણીમાં 10 ફોર્મ રદ થયા બાદ ઉમેદવારી પત્ર પાછુ ખેંચવાની મુદત પુરી થવા સુધીમાં અપક્ષોના 6 ઉમેદવારોએ ઉમેદવારી પાછી ખેંચતા હવે 28 ઉમેદવારો મેદાનમાં રહ્યા છે. 16.56 લાખ મતદારો ધરાવતી જામનગર લોકસભાની બેઠક પર સૌપ્રથમ 44 ઉમેદવારોએ ઉમેદવારી નોંધાવી હતી.
જેમાંથી ફોર્મ રદ થયા બાદ બાકી રહેલા 34 ઉમેદવારોમાંથી ચાવડા જીતેશ ચનાભાઇ, જયદીપ સુભાષભાઇ ઝાલા, જીતેશ બાબુભાઇ રાઠોડ, પરમાર ભરતભાઇ દામજીભાઇ, મામદ હાજી સફીયા તેમજ પત્રકાર રાજ્યગુરૂ રામકૃષ્ણ નરભેશંકર નામના અપક્ષ ઉમેદવારોએ પોતાની ઉમેદવારી પાછી ખેંચી લેવામાં આવતા હવે જામનગર બેઠક પર કુલ 28 ઉમેદવારો વચ્ચે ચૂંટણી લડવા તૈયાર થયા છે.
જામનગર લોકસભા પર 16,56,006 મતદારો નોંધાયેલા છે. તંત્રએ આ બેઠક માટે કુલ 1946 મતદાન મથકો પર મતદાનની વ્યવસ્થા ગોઠવવાની રહેશે. આ વખતે પણ 16 ઉમેદવારોથી ઉમેદવારો વધતા તંત્રને ફરજીયાત દરેક મતદાન મથક પર બે-બે બેલેટ યુનિટ મુકવા પડશે.
આ વખતની ચૂંટણી જંગમાં મુખ્ય હરીફાઇ કોંગ્રેસ મુળુભાઇ કંડોરીયા અને ભાજપાના ગત વખતે 1.75 લાખની જંગી લીડથી ચૂંટાયેલા સાંસદ પૂનમબેન માડમ વચ્ચે રહેશે. વિપક્ષની વાત કરીએ તો બસપાના એક ઉમેદવાર સિવાય બાકીના તમામ 25 અન્ય ઉમેદવારો છે. હાલારમાં મોટી વોટબેંકની વાત કરવામાં આવે તો પટેલ, આહિર, દલિત, સતવારા, ક્ષત્રિય, પરપ્રાંતિયો અને સવર્ણો મોટી વોટબેંક ગણાય છે.
