ગાંધીનગરઃ રાજ્યમાં વિવિધ તાલુકા પંચાયતો અને જિલ્લા પંચાયતની હદના વિસ્તારોને ગાંધીનગર, અમદાવાદ, સુરત, રાજકોટ સહિતની મહાનગરપાલિકાઓમાં ભેળવવામાં આવ્યા હતાં, ત્યારબાદ સરકારે બુધવારે બહાર પાડેલા મુજબ, સુરતમાં 1 વોર્ડ અને 4 બેઠકનો વધારો તથા ગાંધીનગરમાં 3 વોર્ડ અને 12 બેઠકના વધારાને બાદ કરતા બાકીની અમદાવાદ, રાજકોટ સહિતની તમામ મહાનગરપાલિકાઓમાં વોર્ડ અને બેઠક યથાવત રાખવામાં આવી છે.
ગાંધીનગર મનપાની ચૂંટણી એપ્રિલ-2021માં યોજાવાની છે, પરંતુ અન્ય મહાનગરોમાં નવેમ્બર મહિનામાં ચૂંટણી યોજાવાની છે. મહાનગરોના નવા સીમાંકન બાદ રાજકીય પક્ષો ઉમેદવારોની પસંદગી અને જનાધાર વધારવા માટે વ્યૂહરચના ઘડી રહ્યા છે, પરંતુ પંચાયત વિસ્તારોમાં સન્નાટો છે. વિસ્તારમાં ઘટાડા સાથે મનપા સાથે સંકળાયેલી તાલુકા પંચાયતો અને જિલ્લા પંચાયતોની બેઠકોમાં ઘટાડો નિશ્ચિત છે.
ગાંધીનગરમાં પેથાપુર નગરપાલિકા હવે મનપામાં ભળી ગઈ છે, જ્યારે 18 ગામની બેઠકો હવે જિલ્લા પંચાયતમાંથી તબદિલ થઈને મ્યુનિમાં આવી છે. તે જ રીતે સુરત મનપામાં એક વોર્ડ અને ચાર બેઠકો વધી છે, પરંતુ મનપાની બેઠકોમાં વધારાના પગલે જિલ્લા-તાલુકા પંચાયતોની બેઠકોમાં કેટલો ઘટાડો થશે તે અંગે જાહેરનામું બહાર પડ્યું નથી.
મોટાભાગની જિલ્લા અને તાલુકા પંચાયતોમાં ડિસેમ્બર મહિનામાં ચૂંટણી યોજાવાની છે, ત્યારે સરકાર તરફથી જાહેરનામું બહાર ન પડાતા અસમંજસ ઊભી થઈ છે. બેઠકો અને સભ્યોની સંખ્યામાં ઘટાડા સંદર્ભે સમયસર સ્પષ્ટતા ન થાય તો છ મહાનગરપાલિકાની ચૂંટણી સમયસર યોજાઈ જશે, પરંતુ જિલ્લા-તાલુકા પંચાયતોની ચૂંટણીમાં વિલંબ સર્જાવાની શક્યતા છે.
